পেহেলগাম সন্ত্ৰাসবাদী আক্ৰমণৰ পিছৰে পৰা চুবুৰীয়া ৰাষ্ট্ৰ পাকিস্তানৰ বিৰুদ্ধে গ্ৰহণ কৰা কঠোৰ পদক্ষেপৰ পিছত এইবাৰ আন এক ডাঙৰ সিদ্ধান্ত গ্ৰহণ কৰিলে ভাৰত চৰকাৰে। এইবাৰ ভাৰতত ‘ব্লক’ কৰি দিয়া হ’ল পাকিস্তানী প্রধানমন্ত্রী শ্বাহবাজ শ্বৰীফৰ ইউটিউব চেনেল।
ভাৰত বিদ্বেষী প্ৰৰোচনা প্ৰচাৰৰ বাবে ইতিমধ্যে ১৬টাকৈ পাকিস্তানী চেনেল নিষিদ্ধ কৰাৰ পিছত এইবাৰ নিষিদ্ধ হ’ল পাকিস্তানৰ খোদ প্ৰধানমন্ত্ৰীৰেই ইউটিউব চেনেল। ভাৰত চৰকাৰৰ সিদ্ধান্ত অনুসৰি, এতিয়াৰে পৰা ভাৰতৰ কোনো দৰ্শকে এই চেনেলটোৰ ভিডিঅ’ চাব নোৱাৰিব।
চেনেলটো খুলিলে স্ক্ৰীণত প্ৰত্যক্ষ কৰিব এক বিশেষ বাৰ্তা। বাৰ্তাটিত লিখা থাকিব, ‘ৰাষ্ট্ৰীয় নিৰাপত্তা সংক্ৰান্তীয় কাৰণত চৰকাৰী নিৰ্দেশনা অনুসৰি এতিয়াৰ পৰা এই চেনেলৰ বিষয়বস্তু বৰ্তমান ভাৰতত দেখা পোৱা নাযাব।’
অৱশ্যে শ্বাহবাজ শ্বৰীফৰ চেনেল নিষিদ্ধ কৰাৰ কোনো কাৰণ আনুষ্ঠানিকভাৱে প্ৰকাশ কৰা নাই কেন্দ্ৰ চৰকাৰে।
উল্লেখ্য যে, পাকিস্তানী ১৬ টা চেনেল ভাৰতত নিষিদ্ধ কৰাৰ বাবে চৰকাৰক গৃহদপ্তৰে আৰ্জি দিছিল। সেই আৰ্জিৰ ওপৰত ভিত্তি কৰিয়েই কেন্দ্ৰই নিষিদ্ধ কৰিছিল চেনেলকেইটা। নিষিদ্ধ চেনেলকেইটাৰ ভিতৰত আছিল পাকিস্তানৰ কেবাটাও প্ৰথমশাৰীৰ সংবাদ মাধ্যমৰ ইউটিউব চেনেল।
ইয়াৰ উপৰি পাকিস্তানী ক্ৰিকেটাৰ শ্বোয়েইব আখতাৰৰ ইউটিউব চেনেলটোও আছিল ইয়াৰ অন্যতম। পাকিস্তানী চেনেল নিষিদ্ধ কৰাৰ সমান্তৰালকৈ ‘বিবিচি’কো ভাৰত চৰকাৰে সতৰ্কবাণী জাৰি কৰিছে।
স্মৰ্তব্য যে, পেহেলগামত চলা ‘সন্ত্ৰাসবাদী আক্ৰমণ’ক ‘বিদ্ৰোহী আক্ৰমণ’ বুলিহে অভিহিত কৰিছিল ‘বিবিচি’য়ে। ‘সন্ত্ৰাসবাদী’ৰ পৰিৱৰ্তে ‘বিদ্ৰোহী’ বুলি অভিহিত কৰা কাৰ্যত অসন্তুষ্টি প্ৰকাশ কৰিছে ভাৰত চৰকাৰে। ‘বিবিচি’ৰ ভাৰতীয় শাখাৰ প্ৰধান জেকী মাৰ্টিনক অসন্তুষ্টিৰ কথা লিখিতভাৱে জনাই দিছে চৰকাৰে।
