অৱসৰৰ মাত্ৰ দুমাহৰ পাছতেই ডাঙৰ দায়িত্ব লাভ কৰিছে ভাৰতীয় ৰিজাৰ্ভ বেংকৰ প্ৰাক্তন গৱৰ্ণৰ শক্তিকান্ত দাসে। শনিবাৰে প্ৰধানমন্ত্ৰী নৰেন্দ্ৰ মোদীৰ প্ৰধান সচিব-২ হিচাপে নিযুক্তি প্ৰদান কৰিছে শক্তিকান্ত দাসক। প্ৰধানমন্ত্ৰী মোদীৰ কাৰ্যকালৰ অন্ত পৰাৰ লগে লগেই তেওঁৰো কাৰ্যকাল অন্ত পৰিব।
প্ৰধানমন্ত্ৰীৰ প্ৰথম সচিব হিচাপে সম্প্ৰতি কৰ্মৰত হৈ আছে পি কে মিশ্ৰ। এতিয়াৰে পৰা মিশ্ৰ আৰু শক্তিকান্ত দাসে যৌথভাৱে প্ৰধানমন্ত্ৰীৰ ব্যক্তিগত সহায়কাৰী হিচাপে কাৰ্যনিৰ্বাহ কৰিব।
উল্লেখ্য যে ৬ বছৰ আৰ বি আইৰ গভৰ্নৰ হিচাপে কাৰ্যনিৰ্বাহ কৰাৰ পিছত ২০২৪ চনৰ ডিচেম্বৰ মাহত শক্তিকান্ত দাসে অৱসৰ গ্ৰহণ কৰে। শক্তিকান্ত দাসক ২০১৮ চনৰ ডিচেম্বৰ মাহত আৰ বি আইৰ গভৰ্ণৰ হিচাপে নিযুক্তি দিয়া হৈছিল। ২০২৪ চনৰ ১০ ডিচেম্বৰত তেওঁৰ কাৰ্যকাল অন্ত পৰে। ইয়াৰ পিছত সঞ্জয় মালহোত্ৰাক ৰিজাৰ্ভ বেংকৰ গভৰ্ণৰ হিচাপে নিযুক্তি দিয়া হয়।
শক্তিকান্ত দাস তামিলনাডু কেডাৰৰ ১৯৮০ বেটেচৰ আই এ এছ বিষয়া। আৰ বি আইৰ গভৰ্ণৰৰ লগতে তেওঁ বহু গুৰুত্বপূৰ্ণ দায়িত্ব পালন কৰিছে। ২০১৭ চনৰ মে’ মাহলৈকে শক্তিকান্ত দাস আছিল অৰ্থনৈতিক পৰিক্ৰমা সচিব। শক্তিকান্ত দাসে ১৫ নং বিত্ত আয়োগৰ সদস্য হিচাপেও কাম কৰিছিল।
উল্লেখ্য যে, শক্তিকান্ত দাসে বহু আন্তঃৰাষ্ট্ৰীয় মঞ্চত ভাৰতক প্ৰতিনিধিত্ব কৰি আহিছে। শক্তিকান্ত দাসে ব্ৰিকছ, আন্তঃৰাষ্ট্ৰীয় মুদ্ৰা নিধি আৰু ছাৰ্কত ভাৰতৰ প্ৰতিনিধি হিচাপে অংশগ্ৰহণ কৰে।
২০১৬ চনৰ নৱেম্বৰ মাহত যেতিয়া ভাৰতত বিমুদ্ৰাকৰণৰ সিদ্ধান্ত লোৱা হৈছিল তেতিয়া শক্তিকান্ত দাস আৰ বি আইৰ গভৰ্ণৰ আছিল।
