ইংলেণ্ড ভ্ৰমণৰ ঠিক পূৰ্বে যেতিয়া শুভমন গিলক ভাৰতীয় টেষ্ট দলৰ নতুন অধিনায়ক হিচাপে ঘোষণা কৰা হৈছিল, তেতিয়া হয়তো কোনেও আশা কৰা নাছিল যে এই টেষ্ট শৃংখলাত বেটছমেন হিচাপে গিলে কেইবাটাও নতুন অভিলেখ সৃষ্টি কৰিব।
এই টেষ্ট শৃংখলাত এতিয়ালৈকে গিলে ৭০০ৰো অধিক ৰান সংগ্ৰহ কৰিবলৈ সক্ষম হৈছে। ইয়াৰ বিপৰীতে আজিৰ পৰা অ’ভেলত আৰম্ভ হোৱা শৃংখলাৰ পঞ্চম তথা অন্তিমখন মেচত নিজৰ ইনিংছৰ প্ৰথমটো ৰান সংগ্ৰহ কৰাৰ লগে লগে তেওঁ ৫৯ বছৰীয়া এটা ডাঙৰ অভিলেখো ভংগ কৰিবলৈ সক্ষম হয়।
আজিৰ পৰা আৰম্ভ হোৱা পঞ্চমখন টেষ্টত টছত পৰাস্ত হৈ প্ৰথমে বেট ধৰিবলৈ আহে ভাৰতে। ভাৰতীয় দলে ৩৮ ৰান সংগ্ৰহ কৰাৰ সময়তে কে এল ৰাহুলৰ ৰূপত দ্বিতীয়টো উইকেটৰ পতন হয়। ৰাহুলৰ পিছত বেটিং কৰিবলৈ অহা অধিনায়ক গিলে প্ৰথমটো ৰান সংগ্ৰহ কৰাৰ লগে লগে চলিত শৃংখলাটোত তেওঁৰ নামত সংযোজন হয় ৭২৩ ৰান।
ইয়াৰ লগে লগে তেওঁ SENA দেশত অধিনায়ক হিচাপে এটা শৃংখলাত সৰ্বাধিক ৰান সংগ্ৰহ কৰা ক্ৰিকেটাৰত পৰিণত হয়। ইয়াৰ পূৰ্বে এই অভিলেখ আছিল গেৰী ছোবাৰ্ছৰ নামত। ছোবাৰ্ছে ১৯৬৬ চনত ইংলেণ্ডৰ ভূমিত ইংলেণ্ডৰ বিৰুদ্ধে খেলা টেষ্ট শৃংখলাত অধিনায়ক হিচাপে সৰ্বমুঠ ৭২২ ৰান সংগ্ৰহ কৰিছিল।
এই অভিলেখৰ উপৰি অ’ভেল টেষ্টত শুভমন গিলে আন এক ডাঙৰ কৃতিত্ব অৰ্জন কৰিবলৈ সক্ষম হয়। গিল এতিয়া ভাৰতৰ হৈ টেষ্ট শৃংখলাত অধিনায়ক হিচাপে সৰ্বাধিক ৰান সংগ্ৰহ কৰা খেলুৱৈ হিচাপে পৰিগণিত হৈছে।
এই ক্ষেত্ৰত গিলে সুনীল গাভাস্কাৰৰ অভিলেখ ভংগ কৰিছে, য’ত গাভাস্কাৰে ১৯৭৮-৭৯ চনত ৱেষ্ট ইণ্ডিজৰ বিৰুদ্ধে টেষ্ট শৃংখলাত অধিনায়ক হিচাপে মুঠ ৭৩২ ৰান সংগ্ৰহ কৰিছিল। এতিয়া এই তালিকাৰ শীৰ্ষত উপনীত হৈছে শুভমন গিল।
