ইংলেণ্ডৰ বিৰুদ্ধে চলি থকা টেষ্ট শৃংখলাৰ দ্বিতীয়খন মেচৰ প্ৰথম ইনিংছত ভাৰতীয় দলৰ অধিনায়ক শুভমন গিলে দ্বিশতক অৰ্জন কৰি কেইবাটাও অভিলেখ গঢ়িবলৈ সক্ষম হৈছে। টেষ্ট ক্ৰিকেটত ইংলেণ্ডৰ ভূমিত দ্বিশতক অৰ্জন কৰা গিল তৃতীয়গৰাকী ভাৰতীয় বেটাৰৰূপে পৰিগণিত হৈছে।
গিলৰ পূৰ্বে সুনীল গাভাস্কাৰ আৰু ৰাহুল দ্ৰাবিড়ে এই কৃতিত্ব গঢ়িছিল। কেৱল এয়াই নহয় টেষ্ট দলৰ অধিনায়ক হিচাপে গিলে SENA (দক্ষিণ আফ্ৰিকা, ইংলেণ্ড, নিউজিলেণ্ড, অষ্ট্ৰেলিয়া) দেশত দ্বিশতক অৰ্জন কৰা একমাত্ৰ ভাৰতীয় তথা এছিয়াৰ প্ৰথমগৰাকী অধিনায়ক হিচাপে পৰগিণিত হয়।
এই অভিলেখৰ উপৰি আন এক অভিলেখৰ গৰাকীও হয় শুভমন গিল। ইংলেণ্ডৰ ভূমিত সৰ্বাধিক ব্যক্তিগত স্ক’ৰ কৰাৰ ক্ষেত্ৰতো কৃতিত্ব গঢ়িবলৈ সক্ষম হয় ভাৰতীয় অধিনায়কগৰাকী। এই ক্ষেত্ৰত গিলে অতিক্ৰম কৰে সুনীল গাভাস্কাৰ আৰু ৰাহুল দ্ৰাবিড়ক।
বাতৰি লিখা পৰ্যন্ত মেচখনত গিলে এই পৰ্যন্ত ২৩০ ৰান কৰি অপৰাজিত হৈ আছে।
