জম্মু-কাশ্মীৰৰ পেহেলগামত সংঘটিত সন্ত্ৰাসবাদী আক্ৰমণৰ পিছত ভাৰতত সকলো পাকিস্তানী শিল্পীৰ ছ’চিয়েল মিডিয়া একাউণ্টত নিষেধাজ্ঞা আৰোপ কৰা হয়। কিন্তু কিছুদিন পূৰ্বে এই একাউণ্টসমূহৰ পৰা নিষেধাজ্ঞা উঠাই লোৱাৰ সিদ্ধান্ত গ্ৰহণ কৰা হয়। এই সিদ্ধান্তৰ ফলত দেশবাসীৰ মাজত ক্ষোভৰ সৃষ্টি হোৱা পৰিলক্ষিত হৈছে।
অল ইণ্ডিয়া চিনে ৱৰ্কাৰছ এছ’চিয়েশ্যনেও এই সিদ্ধান্তক সমালোচনা কৰি প্ৰধানমন্ত্ৰী নৰেন্দ্ৰ মোদীলৈ এখন পত্ৰ লিখিছিল। এই পত্ৰৰ পিছতে পুনৰ এবাৰ পাকিস্তানী শিল্পীৰ ছ’চিয়েল মিডিয়া একাউণ্ট ভাৰতত নিষিদ্ধ কৰা হৈছে। এই সিদ্ধান্তৰ পিছত ছ’চিয়েল মিডিয়াত ধাৰাবাহিক প্ৰতিক্ৰিয়া অব্যাহত আছে।
খবৰ অনুসৰি, জৰুৰী পৰ্যালোচনা বৈঠকৰ অন্তত ভাৰত চৰকাৰে পুনৰবাৰ কঠোৰ পদক্ষেপ গ্ৰহণ কৰি ভাৰতত ১৮ হাজাৰৰো অধিক পাকিস্তানী ছ’চিয়েল মিডিয়া একাউণ্ট নিষিদ্ধ কৰিছে।
শেহতীয়াকৈ মাউৰা হোকানে, হানিয়া আমিৰ, ফাৱাদ খানৰ দৰে বহু পাকিস্তানী শিল্পী আৰু ক্ৰিকেটাৰৰ ছ’চিয়েল মিডিয়া প্ৰফাইল ভাৰতীয় ব্যৱহাৰকাৰীৰ দৃষ্টিগোচৰ হৈছিল যদিও এতিয়া চৰকাৰৰ নতুন কাৰ্যকলাপৰ অধীনত ভাৰতত পুনৰ এই সকলোৰ একাউণ্ট ব্লক কৰা হৈছে।
উল্লেখ্য যে, যেতিয়া কোনো ভাৰতীয় ব্যৱহাৰকাৰীয়ে পাকিস্তানী শিল্পীৰ ছ’চিয়েল মিডিয়া একাউণ্ট খুলিবলৈ চেষ্টা কৰে, তেতিয়া এই একাউণ্টটো ভাৰতত উপলব্ধ নহয় বুলি এটা বাৰ্তা স্পষ্টভাৱে দেখা যায়।
