চলিত আই পি এল ছিজনৰ ৪১ সংখ্যক মেচখনত মুম্বাই ইণ্ডিয়ানছ আৰু ছানৰাইজাৰ্ছ হায়দৰাবাদৰ খেলুৱৈসকলে ক’লা বেণ্ড পৰিধান কৰি খেলপথাৰত অৱতীৰ্ণ হৈছে। টছৰ পিছত দুয়োটা দলে খেল আৰম্ভ হোৱাৰ পূৰ্বে কেইমিনিটমান মৌনতা অৱলম্বন কৰে। খেলুৱৈসকলৰ লগতে ষ্টেডিয়ামত উপস্থিত থকা সকলো দৰ্শকেও এই সময়ছোৱাত মৌনতা অৱলম্বন কৰিছিল।
খেলুৱৈসকলৰ উপৰি মন্তব্যকাৰী, ক্ৰিকেট বিশেষজ্ঞ আৰু আম্পায়াৰসকলেও ক’লা বেণ্ড পিন্ধা দেখা গৈছিল।
আজিৰ মেচখনত টছত জয়ী হৈ হাৰ্দিক পাণ্ডিয়া নেতৃত্বাধীন মুম্বাই ইণ্ডিয়ানছে প্ৰথমে বল কৰাৰ সিদ্ধান্ত লয়। তেওঁ কয়, ‘প্ৰথমে মই সন্ত্ৰাসবাদী আক্ৰমণৰ বলি হোৱা লোকসকলৰ প্ৰতি মোৰ শোক প্ৰকাশ কৰিব বিচাৰো। আমি এটা দল আৰু ফ্ৰেঞ্চাইজি হিচাপে এনে যিকোনো আক্ৰমণক গৰিহণা দিওঁ।’
ইফালে হায়দৰাবাদৰ অধিনায়ক পেট কামিন্সে কয়, ‘এয়া আমাৰ বাবেও হৃদয়বিদাৰক, আমাৰ সমবেদনা ভুক্তভোগী আৰু তেওঁলোকৰ পৰিয়ালৰ সৈতে।’ আইপিএলৰ তৰফৰ পৰা এই দুয়োজন খেলুৱৈৰ মন্তব্যৰ ভিডিঅ’ ইতিমধ্যে ছ’চিয়েল মিডিয়াত শ্বেয়াৰ কৰিছে।
ইফালে আজিৰ মেচখনৰ পূৰ্বেই আই পি এলে স্পষ্ট কৰি দিছিল যে আজিৰ মেচখনত নাথাকিব চিয়াৰলিডাৰ্ছ। নাথাকিব কোনো ধৰণৰ আতচবাজী।
উল্লেখ্য যে, মঙলবাৰে জম্মু-কাশ্মীৰৰ অনন্তনাগ জিলাৰ পেহেলগামত নৰপিশাচৰূপী সন্ত্ৰাসবাদীয়ে চলোৱা আক্ৰমণত ২৮ জন পৰ্যটকৰ মৃত্যু হৈছে। এই ঘটনাক লৈ বিশ্বৰ প্ৰায়বোৰ দেশে ইয়াক কঠোৰ ভাষাৰে গৰিহণা প্ৰদান কৰিছে।
