বিশ্বৰ সৰ্বাধিক জনপ্ৰিয় টি-২০ লীগ আই পি এলৰ সফল সমাপ্তিৰ পিছতেই পোহৰলৈ আহিছে মেচ ফিক্সিঙৰ ঘটনা। মিচে ফিক্সিঙৰ ঘটনাত সাঙোৰ খাইছে শ্ৰীলংকাৰ প্ৰাক্তন ক্ৰিকেটাৰ সচিত্ৰ সেনানায়কেৰ নাম। লংকা প্ৰিমিয়াৰ লীগৰ সময়ত সতীৰ্থ খেলুৱৈক মেচ ফিক্সিঙৰ বাবে উচটোৱাৰ অভিযোগত সেনানায়কেক হম্বনটোটা উচ্চ ন্যায়ালয়ে দোষী সাব্যস্ত কৰিছে।
এই ঘটনাটো ২০২০ চনৰ আৰু সেনানায়কেৰ ওপৰত অভিযোগ উত্থাপিত হৈছিল যে তেওঁ লংকা প্ৰিমিয়াৰ লীগৰ সময়ত দুগৰাকী সতীৰ্থ খেলুৱৈক মেচ ফিক্সিঙৰ বাবে উচটনি যোগাইছিল।
এই গুৰুতৰ অভিযোগত সেনানায়কেক ২০২০ চনত গ্ৰেপ্তাৰ কৰিছিল যদিও তেওঁ এই সকলোবোৰ অভিযোগ খণ্ডন কৰিছিল। ২০২০ চনত তেওঁক গ্ৰেপ্তাৰ কৰা হৈছিল যদিও পিছত জামিনত তেওঁ মুক্ত হয়। নতুন আইনৰ অধীনত এইটোৱে প্ৰথম কোনো ৰাষ্ট্ৰীয় পৰ্যায়ৰ খেলুৱৈ মেচ ফিক্সিঙৰ অভিযোগত দোষী সাব্যস্ত হৈছে।
এই গুৰুতৰ অভিযোগত দোষী সাব্যস্ত হোৱা সেনানায়কেই ভাৰতীয় মূল্যত প্ৰায় ২.৮৫ কোটি টকা জৰিমনা ভৰিব লাগিব আৰু লগতে ১০ বছৰ পৰ্যন্ত কাৰাবাস খাটিবলগীয়া হ’ব পাৰে।
নিজৰ আন্তঃৰাষ্ট্ৰীয় ক্ৰিকেট কেৰিয়াৰত সেনানায়কেই শ্ৰীলংকাৰ হৈ ২০১২ চনৰ পৰা ২০১৬ চনলৈকে এখন টেষ্ট, ৪৯ খন এদিনীয়া আৰু ২৪ খন টি-২০ আন্তঃৰাষ্ট্ৰীয় মেচ খেলিছিল। এদিনীয়া ক্ৰিকেটত তেওঁ ৫৩টা আৰু টি-২০ত ২৫টা উইকেট দখল কৰিছিল।
উল্লেখ্য যে, সেনানায়কেই ২০১৩ চনত কলকাতা নাইট ৰাইডাৰ্ছৰ হৈও আই পি এল খেলিছিল। সেইটো ছিজনত ৮ খন মেচ খেলি ৯টা উইকেট লাভ কৰিছিল।
