প্ৰায় ১৩ বছৰৰ মূৰত মুম্বাই ইণ্ডিয়ানছ দলে ৰাজস্থান ৰয়েলছ দলক জয়পুৰত পৰাস্ত কৰিবলৈ সক্ষম হ’ল। বৃহস্পতিবাৰে অনুষ্ঠিত হোৱা মেচখনত ৰোহিত শৰ্মা আৰু ৰিকলটনৰ অৰ্ধশতীয় ইনিংছৰ পিছত অধিনায়ক হাৰ্দিক পাণ্ডিয়া আৰু সূৰ্যকুমাৰ যাদৱৰ বিস্ফোৰক ইনিংছৰ সহায়ত প্ৰথমে বেট ধৰি ২১৭ ৰানৰ লক্ষ্য বান্ধি দিয়ে ৰাজস্থান ৰয়েলছক।
বিশাল লক্ষ্যৰ পিছা কৰিবলৈ অহা ৰাজস্থান ৰয়েলছ দলৰ আৰম্ভণি সুখকৰ নাছিল। এজনৰ পিছত আন এজন বেটাৰৰ শোচনীয় প্ৰদৰ্শনৰ বাবেই নিজৰ ঘৰৰ মাটিতে ১০০ ৰানত পৰাজয়বৰণ কৰিবলগীয়া হয় মেচখন। এই পৰাজয়ৰ লগে লগে প্লেঅফৰ দৌৰৰ পৰাও বাহিৰ হয় ৰাজস্থান ৰয়েলছ।
এই মেচখনত মুম্বাই ইণ্ডিয়ানছৰ ২৩টা বলত ৪৮ ৰানৰ ইনিংছ খেলা সূৰ্যকুমাৰ যাদৱৰ নামত সংযোজন হৈছে এক বিশেষ অভিলেখ। সূৰ্যকুমাৰৰ নামত সংযোজন হোৱা এই অভিলেখ আই পি এল ইতিহাসত আন কোনো ক্ৰিকেটাৰৰ নামত নাই।
উল্লেখ্য যে, চলিত আই পি এল ছিজনৰ আটাইকেইখন মেচ (১১ খন)ত ২৫ বা তাতোকৈ অধিক ৰানৰ ইনিংছ খেলা একমাত্ৰ ক্ৰিকেটাৰত পৰিণত হ’ল যাদৱ। এই ক্ষেত্ৰত সূৰ্যকুমাৰে ভংগ কৰে ৰবিন উথাপ্পাৰ অভিলেখ। উথাপ্পাই ২০১৪ চনত একেৰাহে ১০টা ইনিংছত ২৫ বা তাতোকৈ অধিক ৰানৰ ইনিংছ খেলিছিল।
ইয়াৰ উপৰি ষ্টিভ স্মিথে ২০১৬ চনত ৯ বাৰ, ২০২৪ চনত বিৰাট কোহলীয়ে ৯ বাৰ আৰু ছাই সুদৰ্শনে ২০২৩ চনত একেৰাহে ৯ বাৰ ২৫ বা তাতোকৈ অধিক ৰানৰ ইনিংছ খেলিছিল।
উল্লেখ্য যে, চলিত ছিজনত এই পৰ্যন্ত সূৰ্যকুমাৰ যাদৱে ২৯, ৪৮, ২৭*, ৬৭, ২৮, ৪০, ২৬, ৬৮*, ৪০*, ৫৪, ৪৮* ৰানৰ ইনিংছ খেলিছে। সৰ্বাধিক ৰানৰ সৈতে তেওঁৰ ওচৰত আছে অৰেঞ্জ কেপ। এই পৰ্যন্ত যাদৱে ১১টা ইনিংছত ৪৭৫ ৰান সংগ্ৰহ কৰিছে।
