মধ্যপ্ৰাচ্যত চলি থকা সংঘাতৰ মাজতে ইজৰাইলে ছিৰিয়াৰ ৰাজধানী ডামাস্কাছত বৃহৎ বিমান আক্ৰমণ চলায়। এই আক্ৰমণৰ মূল লক্ষ্য আছিল ছিৰিয়াৰ প্ৰতিৰক্ষা মন্ত্ৰালয়। দক্ষিণ ছিৰিয়াত কৰ্মৰত ছিৰিয়াৰ সেনাৰ ইউনিটতো আক্ৰমণ কৰা হয়।
এই সন্দৰ্ভত ইজৰাইলৰ প্ৰতিৰক্ষা মন্ত্ৰীয়ে কয় যে, যদি ছিৰিয়াৰ সেনাই ড্ৰুজ সম্প্ৰদায়ক আক্ৰমণ কৰা বন্ধ নকৰে তেন্তে তেওঁলোকৰ ওপৰত ধ্বংসলীলা অব্যাহত থাকিব। উল্লেখ্য যে, দক্ষিণ ছিৰিয়াৰ ছুৱাইডা চহৰত ড্ৰুজ যোদ্ধা আৰু ছিৰিয়াৰ সেনাৰ মাজত তীব্ৰ সংঘৰ্ষ চলি আছে। এই পৰ্যন্ত শ শ লোকৰ মৃত্যু হৈছে। চৰকাৰী সেনাই ড্ৰুজ লোকক নিৰ্মমভাৱে হত্যা কৰা বুলি অভিযোগ উত্থাপন কৰিছে ড্ৰুজ নেতাগৰাকীয়ে। ছিৰিয়া চৰকাৰে দাবী কৰিছে যে এই হিংসাত্মক পৰিস্থিতি অপৰাধী চক্ৰৰ দ্বাৰা সংঘটিত হৈছে যদিও আন্তঃৰাষ্ট্ৰীয় প্ৰতিবেদনসমূহে ইয়াক সন্দেহৰ দৃষ্টিৰে চাইছে।
ড্ৰুজ সম্প্ৰদায় এটা বিশেষ সংখ্যালঘু গোট। যি আৰব মূলৰ, কিন্তু তেওঁলোকে ইছলাম বা ইহুদী ধৰ্মত বিশ্বাস নকৰে। একাদশ শতিকাৰ আশে-পাশে তেওঁলোকে মিচৰত বাস কৰিছিল। তেওঁলোকৰ ধৰ্ম হিন্দু, বৌদ্ধ আৰু অন্যান্য বিশ্বাসৰ মিশ্ৰণ।
ড্ৰুজ সম্প্ৰদায়ৰ প্ৰায় ৭ লাখ লোক ছিৰিয়াত বাস কৰে। ইজৰাইলত তেওঁলোকৰ সংখ্যা প্ৰায় ১.৫ লাখ। লেবানন, জৰ্ডানতো ড্ৰুজ সম্প্ৰদায়ৰ বহু সংখ্যক লোক আছে। প্ৰায় ২৯ হাজাৰ ড্ৰুজ গোলান হাইটছত বাস কৰে। ইজৰাইলৰ ড্ৰুজ নাগৰিকসকলেও ইজৰাইলৰ সেনাবাহিনীত সেৱা আগবঢ়ায়।
আমেৰিকাৰ বিশেষ দূত টম বেৰেকে কয় যে, আমেৰিকাই ছুইডাত সাধাৰণ নাগৰিকৰ ওপৰত হোৱা হিংসাক কঠোৰভাৱে গৰিহণা দিছো। সকলো পক্ষই পিছুৱাই গৈ অৰ্থপূৰ্ণ আলোচনাত লিপ্ত হ’ব লাগে। আমেৰিকাই স্পষ্ট কৰি দিছে যে সাধাৰণ নাগৰিক আৰু সংখ্যালঘুৰ সুৰক্ষা নিশ্চিত কৰা উচিত। অপৰাধীক জবাবদিহি কৰিব লাগে। যথাসম্ভৱ সোনকালে যুদ্ধবিৰতি কাৰ্যকৰী কৰিব লাগে।
