দেশত প্ৰথমবাৰৰ বাবে ৰাজ্যপাল বা ৰাষ্ট্ৰপতিৰ অনুমোদন অবিহনে আইনত পৰিণত হ’ল বিধেয়ক। এই ঐতিহাসিক ঘটনা সংঘটিত হৈছে তামিলনাডুত। তামিলনাডুৰ ৰাজ্যপাল আৰ এন ৰবিয়ে বিধেয়ক অনুমোদন নজনোৱাৰ গোচৰত উচ্চতম ন্যায়ালয়ে দিয়া সিদ্ধান্তৰ পিছতেই এই নজিৰবিহীন ঘটনা সংঘটিত হয়।
গোচৰৰ শুনানি গ্ৰহণ কৰি ন্যায়াধীশ এছ বি পাৰ্দিৱালা আৰু আৰ মহাদেৱনৰ বিচাৰপীঠে এই বিধেয়কসমূহ আইনত পৰিণত হোৱাৰ নিৰ্দেশ প্ৰদান কৰে।
উল্লেখ্য যে, তামিলনাডুৰ ১০খন বিধেয়ক ৰাজ্যপালৰ অনুমোদনৰ বাবে কেইবামাহো অপেক্ষা কৰাৰ পিছত উপায়হীন হৈ ডি এম কে চৰকাৰে উচ্চতম ন্যায়ালয়ৰ দ্বাৰস্থ হৈছিল। সেই গোচৰত উচ্চতম ন্যায়ালয়ে ৰাজ্যপালক বিধেয়ক গৃহীত কৰিবলৈ নিৰ্দিষ্ট নিৰ্দেশ দিয়ে।
ইয়াৰ উপৰি কোনো বিধেয়ক আইনত পৰিণত হ’ব নে নহয় সেই সন্দৰ্ভতো ৰাষ্ট্ৰপতিৰ বাবে সময়সীমা নিৰ্ধাৰণ কৰে উচ্চতম ন্যায়ালয়ে। দেশত প্ৰথমবাৰৰ বাবে উচ্চতম ন্যায়ালয়ে ৰাষ্ট্ৰপতিক সময়সীমাসহ ৰাজ্যিক বিধেয়কত স্বাক্ষৰ কৰিবলৈ নিৰ্দেশ প্ৰদান কৰিছে।
উচ্চতম ন্যায়ালয়ৰ নিৰ্দেশনাৰ পিছতে তামিলনাডু চৰকাৰে এক অধিসূচনা জাৰি কৰি ১০খন বিধেয়কক আইন হিচাপে ঘোষণা কৰে। ফলত দেশৰ ইতিহাসত প্ৰথমবাৰৰ বাবে ৰাজ্যপাল বা ৰাষ্ট্ৰপতিৰ স্বাক্ষৰ নোহোৱাকৈ কোনো আইন প্ৰণয়ন কৰা হয়। এই আইনসমূহৰ ভিতৰত বিশ্ববিদ্যালয় সম্পৰ্কীয় কেইবাখনো আইন অন্তৰ্ভুক্ত কৰা হৈছে। ইয়াৰ উপৰি সংশোধনী আইনো আছে।
উল্লেখ্য যে, দীৰ্ঘদিন ধৰি তামিলনাডু চৰকাৰ আৰু ৰাজ্যপালৰ মাজত চলি থকা সংঘাত সৰ্বজনবিদিত। এই সংঘাতৰ বাবেই তামিলনাডু বিধানসভাই গৃহীত কৰা বিধেয়কসমূহে ৰাজ্যপালৰ অনুমোদন লাভ কৰা নাছিল।
