মঙলবাৰে তামিলনাডুৰ বিৰুধুনগৰ জিলাৰ শিৱকাশীস্থিত এটা আতচবাজী কাৰখানাত ভয়ংকৰ অগ্নিকাণ্ড সংঘটিত হয়। আতচবাজী কাৰখানাটোত হঠাতে হোৱা বিস্ফোৰণত দুগৰাকী মহিলাকে ধৰি কমেও পাঁচজন শ্ৰমিকৰ মৃত্যু হোৱা বুলি আৰক্ষীয়ে জনাইছে।
বিস্ফোৰণটো ইমানেই শক্তিশালী আছিল যে আতচবাজী কাৰখানাটো সম্পূৰ্ণৰূপে ধ্বংস হৈ যায়।
বিস্ফোৰণৰ পিছতেই আতচবাজী কাৰখানাটো জুইৰ লেলিহান শিখাই আৱৰি ধৰে আৰু ততাতয়াকৈ ঘটনাস্থলত আৰক্ষী আৰু উদ্ধাৰকাৰী দল উপস্থিত হৈ পৰিস্থিতিত নিয়ন্ত্ৰণৰ চেষ্টা চলায়।
আৰক্ষীয়ে জানিব দিয়া অনুসৰি, বিস্ফোৰণৰ পিছতেই কাৰখানাটোত সংঘটিত অগ্নিকাণ্ডত কেইবাজনো শ্ৰমিক গুৰুতৰভাৱে আহত হয়। আহত লোকসকলক উদ্ধাৰ কৰি সমীপৱৰ্তী হাস্পতালত ভৰ্তি কৰোৱা হৈছে।
সম্প্ৰতি কাৰখানাটোৰ জুই নিৰ্বাপন কৰা হৈছে যদিও উদ্ধাৰকাৰী দলে বৰ্তমান ধ্বংসাৱশেষ আঁতৰোৱাৰ কাম কৰি আছে বুলি অগ্নি নিৰ্বাপক বাহিনীৰ এগৰাকী শীৰ্ষ বিষয়াই জনায়।
শিৱকাশীৰ সমীপৰ চিন্নাকামনপট্টীস্থিত এটা ব্যক্তিগত আতচবাজী কাৰখানাত হোৱা এই কৰুণ ঘটনা সন্দৰ্ভত বৰ্তমান আৰক্ষী আৰু আন আন শীৰ্ষ বিষয়াসকলে তদন্ত আৰম্ভ কৰিছে।
কাৰাখানাটোত ৰাসায়নিক পদাৰ্থ মিহলোৱাৰ প্ৰক্ৰিয়া চলি থকাৰ সময়তে এই বিস্ফোৰণ সংঘটিত হোৱা প্ৰাথমিক তদন্তত অনুমান কৰা হৈছে।
