পাকিস্তান আৰু বাংলাদেশৰ মাজত চলি থকা টি-২০ শৃংখলাৰ দ্বিতীয়খন মেচত ৫৭ ৰানত জয়ী হয় পাকিস্তান। মেচখনত পাকিস্তানে প্ৰথমে বেট ধৰি নিৰ্ধাৰিত ২০ অভাৰত ৬ উইকেটৰ বিনিময়ত ২০১ ৰান সংগ্ৰহ কৰিছিল। ইয়াৰ প্ৰত্যুত্তৰত বাংলাদেশে মাত্ৰ ১৪৪ ৰানতে আটাইকেইটা উইকেট হেৰুৱাই শোচনীয় পৰাজয়বৰণ কৰে।
মেচখনত পৰাস্ত হ’লেও বাংলাদেশৰ তাঞ্জিম হাছান ছাকিবে টি-২০ আন্তঃৰাষ্ট্ৰীয় এক বিৰল অভিলেখ গঢ়িবলৈ সক্ষম হয়। টি-২০ আন্তঃৰাষ্ট্ৰীয় মেচত পূৰ্ণ সদস্য দলৰ হৈ ৯ নম্বৰ স্থানত বেটিং কৰি অৰ্ধশতক অৰ্জন কৰা বিশ্বৰ প্ৰথমজন বেটছমেন হিচাপে পৰিগণিত হৈছে তাঞ্জিম হাছান ছাকিব।
পাকিস্তানৰ বিৰুদ্ধে দ্বিতীয়খন টি-২০ মেচত তাঞ্জিম হাছান ছাকিবে ৩১টা বলত ৫০ ৰান সংগ্ৰহ কৰে। তেওঁৰ ইনিংছটোত আছিল এটা চাৰি আৰু ৫টা ছয়।
লাহোৰত অনুষ্ঠিত শৃংখলাৰ দ্বিতীয়খন টি-২০ত পাকিস্তানৰ হৈ ছাহিবজাদা ফাৰহানে ৭৪, হাছান নাৱাজে ৫১ আৰু মহম্মদ হেৰিছৰ ৪১ ৰানৰ গুৰুত্বপূৰ্ণ ইনিংছৰ সহায়ত ২০১ ৰান সংগ্ৰহ কৰে। ইয়াৰ প্ৰত্যুত্তৰত বাংলাদেশ দলটোৱে মাত্ৰ ১৯ অভাৰতে আটাইকেইটা হেৰুৱাই কেৱল ১৪৪ ৰানহে সংগ্ৰহ কৰিবলৈ সক্ষম হয়। বাংলাদেশ হৈ একমাত্ৰ তাঞ্জিন হাছান ছাকিবেই সৰ্বাধিক অৰ্ধশতকীয় ইনিংছ খেলে।
