ৰোহিত শৰ্মা আৰু বিৰাট কোহলী অবিহনে ভাৰতীয় দলে টেষ্ট ক্ৰিকেটত আৰম্ভ কৰিব এক নতুন অধ্যায়। দুয়োগৰাকী ক্ৰিকেটাৰৰ অনুপস্থিতিত প্ৰথমবাৰৰ বাবে ইংলেণ্ডৰ বিৰুদ্ধে ২০ জুনৰ পৰা টেষ্ট শৃংখলাত অংশ ল’ব ভাৰতে। দলক নেতৃত্ব প্ৰদান কৰিব যুৱ ক্ৰিকেটাৰ শুভমন গিলে।
এই শৃংখলাটোৰ প্ৰথমখন মেচৰ বাবে ভাৰতীয় ক্ৰিকেট দলটোৱে কিধৰণে ইংলেণ্ডৰ বিৰুদ্ধে খেলিব লাগে সেই সম্পৰ্কে মত আগবঢ়াইছে ভাৰতীয় ক্ৰিকেট দলৰ প্ৰাক্তন মুখ্য প্ৰশিক্ষক ৰবি শাস্ত্ৰীয়ে।
আই চি চিৰ ৱেবছাইটত প্ৰকাশিত এটা সাক্ষাতকাৰত শাস্ত্ৰীয়ে কয় যে ভাৰতে এতিয়া নতুন চিন্তা আৰু নতুন পৰিকল্পনাৰে খেলপথাৰত নামিব লাগিব, কাৰণ এয়া কেৱল শৃংখলা নহয় বৰঞ্চ নতুন বিশ্ব টেষ্ট চেম্পিয়নশ্বিপ (WTC) চক্ৰৰ আৰম্ভণিও।
ইংলেণ্ডৰ বিৰুদ্ধে খেলিবলগীয়া শৃংখলাৰ প্ৰথমখন মেচৰ বাবে শাস্ত্ৰীয়ে অপেনিং বেটাৰ হিচাপে যশস্বী জয়ছোৱাল আৰু কে এল ৰাহুলক অগ্ৰাধিকাৰ প্ৰদান কৰিছে। তেওঁ কয়, ‘বিগত ইংলেণ্ড ভ্ৰমণত ৰাহুলে ভাল বেটিং কৰিছিল, শতকো অৰ্জন কৰিছিল, সেয়ে সেই অভিজ্ঞতা এইবাৰ কামত আহিব।’
তৃতীয় স্থানৰ বাবে নিৰ্বাচিত কৰিছে ছাই সুদৰ্শনক। ‘মই তেওঁক ঘৰুৱা আৰু আই পি এলত খেলা দেখিছো, এই শৃংখলাটো তেওঁৰ বাবে অত্যন্ত গুৰুত্বপূৰ্ণ হিচাপে বিবেচিত হ’ব,’ শাস্ত্ৰীয়ে এইদৰে কয়।
ইফালে চতুৰ্থ স্থানত নিৰ্বাচিত কৰিছে নতুনকৈ অধিনায়কৰ দায়িত্ব লাভ কৰা শুভমন গিলক। দীৰ্ঘ সময়ৰ মূৰত দললৈ প্ৰত্যাৱৰ্তন ঘটা কৰুন নায়াৰক পঞ্চম স্থানত স্থান দিছে। ষষ্ঠ স্থানত উইকেটকীপাৰ বেটাৰ ঋষভ পন্ত, মুখ্য স্পিনাৰ আৰু অলৰাউণ্ডাৰ হিচাপে সপ্তম স্থানত ৰবীন্দ্ৰ জাদেজাক নিৰ্বাচিত কৰিছে।
অষ্টম স্থানৰ বাবে চাৰ্দুল ঠাকুৰ আৰু নীতিশ ৰেড্ডীৰ মাজৰ এজনক স্থান দিয়াৰ পোষকতা কৰে।
আনহাতে বেগী বলাৰৰূপে শাস্ত্ৰীয়ে যশপ্ৰীত বুমৰাহ, মহম্মদ ছিৰাজ আৰু প্ৰসিদ্ধ কৃষ্ণাক দলত স্থান প্ৰদান কৰিছে। অৱশ্যে বতৰ আৰু পৰিস্থিতি সাপেক্ষে মূল একাদশত অৰ্শদীৰ সিঙকো অন্তৰ্ভুক্ত কৰিব পাৰে।
ইংলেণ্ডৰ বিৰুদ্ধে ৰবি শাস্ত্ৰীৰ সম্ভাৱ্য মূল একাদশ
১/ যশস্বী জয়ছোৱাল
২/ কে এল ৰাহুল
৩/ ছাই সুদৰ্শন
৪) শুভমন গিল (অধিনায়ক)
৫/ কৰুণ নায়াৰ
৬) ঋষভ পন্ত (উইকেটকীপাৰ)
৭) ৰবীন্দ্ৰ জাদেজা
৮) চাৰ্দুল ঠাকুৰ/নীতিশ ৰেড্ডী
৯) মহম্মদ ছিৰাজ
১০) প্ৰসিদ্ধ কৃষ্ণা/অৰ্শদীপ সিং
১১) যশপ্ৰীত বুমৰাহ
