ৰয়েল চেলেঞ্জাৰ্ছ বাংগালুৰুৱে আই পি এল ইতিহাসত প্ৰথমবাৰৰ বাবে খিতাপ দখলৰ পাছতেই আজি কৰ্ণাটকৰ বাংলাগালুৰত আয়োজন কৰা বিজয় উৎসৱত ভয়ংকৰ ঘটনা সংঘটিত হৈছে। বাংগালুৰুৰ চিন্নাস্বামী ষ্টেডিয়ামৰ বাহিৰত অজস্ৰ অনুৰাগী সমবেত হোৱাৰ সময়তে সংঘটিত পদপিষ্টৰ ঘটনাত ১১ জন অনুৰাগীৰ মৃত্যু হয়।
এই ঘটনাত আন ২৫ গৰাকীৰো অধিক লোক গুৰুতৰভাৱে আহত হোৱাৰ খবৰ আহিছে। ইফালে মৃতকৰ সংখ্যা আৰু অধিক বৃদ্ধি পোৱাৰ সম্ভাৱনা আছে বুলি বিভিন্ন সংবাদ মাধ্যমত প্ৰকাশ পাইছে।
জানিব পৰা অনুসৰি, চিন্নাস্বামী ষ্টেডিয়ামৰ মূল প্ৰৱেশ দ্বাৰত এই ঘটনা সংঘটিত হৈছে।
শেহতীয়াকৈ লাভ কৰা তথ্য অনুসৰি, হাজাৰ হাজাৰ লোকে তেওঁলোকৰ প্ৰিয় দল ৰয়েল চেলেঞ্জাৰ্ছ বাংগালুৰুক শুভেচ্ছা জনাবলৈ উপস্থিত হৈছিল। এই সময়তে ভিৰ নিয়ন্ত্ৰণৰ বাহিৰত যোৱাৰ ফলত এই পদপিষ্টৰ ঘটনা সংঘটিত হয়।
ইফালে আহতসকলক ততাতয়াকৈ এম্বুলেঞ্চৰ জৰিয়তে হাস্পতালত ভৰ্তি কৰোৱা হৈছে। ঘটনাস্থলত থকা আন লোকসকলে আহত লোকসকলক সহায় তথা উদ্ধাৰ কৰা পৰিলক্ষিত হয়।
উল্লেখ্য যে, কৰ্ণাটক ৰাজ্যিক ক্ৰিকেট সন্থাই আই পি এল ২০২৫ত ঐতিহাসিক জয়ৰ পিছত ৰয়েল চেলেঞ্জাৰ্ছ বাংগালুৰুৰ বাবে এক সম্বৰ্ধনা অনুষ্ঠানৰ আয়োজন কৰে, য’ত লাখ-লাখ অনুৰাগী উপস্থিত হয়।
