দেশৰ ৰাজধানী দিল্লীত সংঘটিত হৈছে এক চাঞ্চল্যকৰ ঘটনা। শনিবাৰে নিশা হোৱা ধাৰাসাৰ বৰষুণ ফলত পুৰণি ৰাজেন্দ্ৰ নগৰস্থিত এটা কোচিং চেণ্টাৰৰ বেছমেণ্টত হঠাতে পানীৰে ভৰি পৰাৰ ফলত তিনিগৰাকী শিক্ষাৰ্থীৰ কৰুণ মৃত্যু হয়।
মৃত শিক্ষাৰ্থী তিনিগৰাকীৰ ভিতৰত আছিল দুগৰাকী ছাত্ৰী আৰু এজন ছাত্ৰ। জানিব পৰা মতে, মৃত ছাত্ৰী শ্ৰেয়া যাদৱৰ ঘৰ উত্তৰ প্ৰদেশৰ আম্বেদকাৰ নগৰ জিলাত, তানিয়া ছোনিৰ ঘৰ তেলেংগানাত আৰু ছাত্ৰজন কেৰালাৰ এৰ্নাকুলামৰ নৱীন দলৱিন বুলি জানিব পৰা গৈছে।
জানিব পৰা মতে, কালি নিশা হোৱা ধাৰাসাৰ বৰষুণৰ ফলত ৰাজধানীত দিল্লীৰ বিভিন্ন অঞ্চলৰ লগতে পুৰণি ৰাজেন্দ্ৰ নগৰৰ কোটিং চেণ্টাৰটোও পানীত বুৰ যায়। যাৰ ফলত কোচিং চেণ্টাৰটোত আৱদ্ধ হৈ পৰে বহু শিক্ষাৰ্থী।
৪ ঘণ্টাৰো অধিক সময় আৱদ্ধ হৈ পৰাৰ পিছত বিদ্যুৎস্পৃষ্ট হৈ তিনিওগৰাকী শিক্ষাৰ্থীৰ মৃত্যু হোৱা বুলি জানিব পৰা গৈছে। ঘটনাৰ খবৰ পোৱাৰ পিছতে আৰক্ষী, এন ডি আৰ এফ আৰু অগ্নিনিৰ্বাপক বাহিনীৰ দলে অভিযান চলাই শিক্ষাৰ্থী তিনিগৰাকীৰ মৃতদেহ কেইটা উদ্ধাৰ কৰে।
কেন্দ্ৰীয় লোকসেৱা আয়োগৰ প্ৰস্তুতি চলাই থকা শিক্ষাৰ্থী কেইগৰাকীৰ সৈতে সংঘটিত এই কৰুণ ঘটনাক লৈ বৰ্তমান দেশৰ ৰাজনীতি উত্তাল হৈ পৰিছে। বিজেপি, কংগ্ৰেছকে ধৰি আন কেইবাটাও ৰাজনৈতিক তথা অৰাজনৈতিক সংগঠনে ইয়াৰ বাবে দোষাৰোপ কৰিছে দিল্লী চৰকাৰক।
উল্লেখ্য যে, কোচিং চেণ্টাৰৰ এই ঘটনাৰ বিৰুদ্ধে শীঘ্ৰে ব্যৱস্থা গ্ৰহণৰ দাবীত গোটেই নিশা ইউ পি এছ চিৰ ছাত্ৰ-ছাত্ৰীসকলে প্ৰতিবাদ সাব্যস্ত কৰে। প্ৰতিবাদৰ পিছতে দিল্লী আৰক্ষীয়ে কাৰোল বাগস্থিত ৰাও ষ্টাডি চাৰ্কল (আই এ এছ কোচিং চেণ্টাৰ)ৰ স্বত্বাধিকাৰী তথা সমন্বয়কক আটক কৰি সোধা পোচা অব্যাহত ৰাখিছে।
