বুধবাৰে মৃত্যু হয় বছিৰহাট তৃণমূল কংগ্ৰেছৰ সাংসদ হাজী নুৰুল ইছলামৰ। তথ্য অনুসৰি নুৰুল ইছলাম দীৰ্ঘদিন ধৰি যকৃতৰ কৰ্কট ৰোগত আক্ৰান্ত হৈ আছিল। উত্তৰ ২৪ পৰগনা জিলাৰ নিজা বাসগৃহত বুধবাৰে মৃত্যু হয় তৃণমূলৰ সাংসদগৰাকীৰ।
মৃত্যুৰ সময়ত তেওঁৰ বয়স আছিল ৬১ বছৰ। প্ৰাক্তন সাংসদ নুছৰত জাহানৰ ঠাইত বছিৰহাটৰ পৰা তৃণমূল কংগ্ৰেছে তেওঁক প্ৰাৰ্থিত্ব প্ৰদান কৰিছিল।
হাজী নুৰুল ইছলামৰ মৃত্যুত শোক প্ৰকাশ কৰিছে বংগৰ মুখ্যমন্ত্ৰী মমতা বেনাৰ্জীয়ে। মমতাই এক্সৰ জৰিয়তে লিখিছে যে আমাৰ বছিৰহাটৰ সাংসদ হাজী এছ কে নুৰুল ইছলামৰ মৃত্যুৰ কথা জানি দুঃখিত। তেওঁ আছিল মোৰ গুৰুত্বপূৰ্ণ সহযোগী। সুদূৰ সুন্দৰবন অঞ্চলৰ এজন নিষ্ঠাবান সমাজকৰ্মী হিচাপে তেওঁ পিছপৰা অঞ্চলৰ দৰিদ্ৰ জনসাধাৰণৰ উত্থানৰ বাবে কঠোৰ পৰিশ্ৰম কৰিছিল। বছিৰহাটৰ ৰাইজে তেওঁৰ নেতৃত্বক স্মৰণ কৰিব। তেখেতৰ পৰিয়াল, বন্ধু-বান্ধৱী আৰু সহকৰ্মী সকলৰ প্ৰতি সমবেদনা জ্ঞাপন কৰিছো।‘
উল্লেখ্য যে, ২০০৯ চনত প্ৰথমবাৰৰ বাবে বছিৰহাট লোকসভাৰ আসনৰ পৰা নিৰ্বাচিত হৈছিল নুৰুল ইছলাম। ২০১৬ চনত বাছিৰহাটৰ হৰুৱা বিধান সভা সমষ্টিৰ পৰা তৃণমূলৰ টিকটত বিধায়ক নিৰ্বাচিত হৈছিল। ২০২৪ চনত দলটোৱে পুনৰবাৰ তেওঁৰ ওপৰত আস্থা প্ৰকাশ কৰি বছিৰহাটৰ পৰা তেওঁক প্ৰাৰ্থিত্ব প্ৰদান কৰে।
তেওঁৰ ওপৰত নেতৃত্বই দেখুওৱা আস্থাক নিৰাশ নকৰি দ্বিতীয়বাৰৰ বাবে এই আসনৰ পৰা সাংসদ হিচাপে নিৰ্বাচিত হয়। তেওঁ বিজেপিৰ প্ৰাৰ্থী ৰেখা পাত্ৰক বৃহৎ ব্যৱধানত পৰাস্ত কৰিছিল।
ইফালে এই নেতাগৰাকীৰ মৃত্যুত তৃণমূলৰ ৰাষ্ট্ৰীয় সাধাৰণ সম্পাদক অভিষেক বেনাৰ্জীয়েও শোকপ্ৰকাশ কৰি দলে এজন প্ৰকৃত নেতাক হেৰুওৱা বুলি মন্তব্য কৰে।
