ব্যৱসায়িক জগতত পুনৰ আলোড়নৰ সৃষ্টি কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ইউৰোপীয় সংঘৰ পৰা আমদানি কৰা সকলো সামগ্ৰীৰ ওপৰত ৫০% শুল্ক আৰু বিদেশী স্মাৰ্টফোনৰ ওপৰত ২৫% শুল্ক ১ জুনৰ পৰা ঘোষণা কৰিছে।
ট্ৰাম্পৰ এই সিদ্ধান্তই আন্তঃৰাষ্ট্ৰীয় বজাৰ আৰু বিশ্ব কূটনীতিত অস্থিৰতাৰ সৃষ্টি কৰিছে। ইতিমধ্যে চীনৰ শুল্ক পৰিহাৰ কৰিবলৈ ভাৰতলৈ উৎপাদন স্থানান্তৰিত কৰা এপল এতিয়া ট্ৰাম্পৰ লক্ষ্য হৈ পৰিছে।
ট্ৰাম্পে কোম্পানীটোৰ চিইঅ’ টিম কুকক স্পষ্টভাৱে সকীয়াই দিছে যে, তেওঁ হয় আমেৰিকাত এপল নিৰ্মাণ কৰিব লাগে, অথবা ২৫ শতাংশ কৰ দিব লাগে। এইদৰে আইফোনত গধুৰ শুল্কৰ পোনপটীয়া অৰ্থ হ’ল- এপলৰ স্মাৰ্টফোন ব্যয়বহুল হৈ পৰিব আৰু আমেৰিকাৰ বজাৰত ইয়াৰ চাহিদা হ্ৰাস পাব। এই সিদ্ধান্তৰ পিছত এপলৰ শ্বেয়াৰ ৩% হ্ৰাস পাইছে, যিয়ে বজাৰৰ পৰিস্থিতি গুৰুতৰ হৈ পৰাৰ ইংগিত দিয়ে।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ৫০ শতাংশ শুল্ক আৰোপ কৰাৰ পিছত ইউৰোপীয় ইউনিয়নৰ বাণিজ্যিক মুৰব্বী মাৰ’ছ চেফকোভিচে পাৰস্পৰিক সন্মান আৰু শান্তিৰ আহ্বান জনাইছে। ইয়াৰ উপৰিও ডাচ প্ৰধানমন্ত্ৰী ডিক শ্বুফে কয় যে এইটো ট্ৰাম্পৰ পুৰণি কৌশল, তেওঁ কেৱল ভাবুকি দিয়েই দৰদাম কৰে।
ইউৰোপীয় ইউনিয়নৰ ওপৰত যদি ৫০ শতাংশ শুল্ক আৰোপ কৰা হয়, তেন্তে ইয়াৰ বাবে বহু ধৰণৰ সামগ্ৰী ব্যয়বহুল হৈ পৰিব। ইয়াৰ বাবে গাড়ী, ঔষধ, বিমান আৰু বিমানৰ অংশৰ দাম বৃদ্ধি পাব। এই অঞ্চলসমূহত ৫০% শুল্ক থকাৰ বাবে আমেৰিকাৰ গ্ৰাহকসকলেও গধুৰ মূল্য দিবলগীয়া হ’ব পাৰে।
ট্ৰাম্পৰ এই সিদ্ধান্তৰ বাবে আমেৰিকা আৰু ইউৰোপৰ শ্বেয়াৰ বজাৰত অৱনতি ঘটিছে। সোণৰ মূল্য বৃদ্ধি পাইছে।
