ইৰাণ-ইজৰাইলৰ পিছত এতিয়া গাজালৈ শান্তি উভতি অহাৰ উপক্ৰম হৈছে। আমেৰিকাৰ ৰাষ্ট্ৰপতি ড’নাল্ড ট্ৰাম্পে দাবী কৰিছে যে, ইজৰাইলে গাজাত ৬০ দিনীয়া যুদ্ধবিৰতিৰ বাবে সন্মতি প্ৰকাশ কৰিছে।
অৱশ্যে ইয়াৰ বাবে কিছু চৰ্তও নিৰ্ধাৰণ কৰা হৈছে। এই বিষয় সন্দৰ্ভত হামাছকো সকীয়াই দিছে ট্ৰাম্পে। তেওঁ হামাছক পৰিস্থিতি অধিক ভয়াৱহ হোৱাৰ পূৰ্বে এই চুক্তি মানি ল’বলৈ জনায়।
মাৰ্কিন ৰাষ্ট্ৰপতি ড’নাল্ড ট্ৰাম্পে সামাজিক মাধ্যমৰ জৰিয়তে কয় যে, তেওঁৰ প্ৰতিনিধিসকলে আজি গাজা ইজৰাইলৰ বিষয়ত ইজৰাইলৰ নেতাসকলৰ সৈতে এক দীঘলীয়া আৰু ফলপ্ৰসূ বৈঠকত মিলিত হয়। ইজৰাইলে ৬০ দিনীয়া যুদ্ধবিৰতি চূড়ান্ত কৰিবলৈ প্ৰয়োজনীয় চৰ্তসমূহৰ ওপৰত সন্মতি প্ৰকাশ কৰিছে, য’ত আমেৰিকাই সকলো পক্ষৰ সৈতে যুদ্ধৰ অন্ত পেলাবলৈ কাম কৰিব।
৭ জুলাইত হোৱাইট হাউছত ইজৰাইলৰ প্ৰধানমন্ত্ৰী বেঞ্জামিন নেতান্যায়াহুক আতিথ্য প্ৰদান কৰিব আমেৰিকাৰ ৰাষ্ট্ৰপতি ড’নাল্ড ট্ৰাম্পে।‘দ্য ইজৰাইল টাইমছ’ক এই কথা নিশ্চিত কৰিছে হোৱাইট হাউছে। গাজাত যুদ্ধবিৰতি আৰু পণবন্দীসকলক মুকলি কৰি দিয়াৰ বাবে ট্ৰাম্পে প্ৰচেষ্টা তীব্ৰতৰ কৰি তুলিছে।
২০২৫ চনৰ জানুৱাৰী মাহত ড’নাল্ড ট্ৰাম্পে ক্ষমতালৈ অহাৰ পিছত নেতান্যায়াহুৰ এইটোৱেই হ’ব তৃতীয়বাৰৰ বাবে হোৱাইট হাউছ ভ্ৰমণ।এই বৈঠকত গাজা আৰু ইৰাণৰ আঞ্চলিক কাৰ্যকলাপ আৰু কূটনৈতিক সম্পৰ্ক সম্প্ৰসাৰণৰ ওপৰত গুৰুত্ব আৰোপ কৰা হ’ব।
শেহতীয়াকৈ ড’নাল্ড ট্ৰাম্পে অহা সপ্তাহৰ ভিতৰত গাজাত যুদ্ধবিৰতিৰ সম্ভাৱনা প্ৰকাশ কৰি সংঘাতৰ অন্ত পেলোৱাৰ ওপৰত পুনৰ মনোনিৱেশ কৰাৰ ইংগিত দিছে। ইৰাণৰ পাৰমাণৱিক কেন্দ্ৰত আমেৰিকাৰ আক্ৰমণৰ পিছতে নেতানিয়াহুৰ আমেৰিকা ভ্ৰমণ। সেই সময়ত ট্ৰাম্পে ইজৰাইল আৰু ইৰাণৰ মাজত যুদ্ধবিৰতি অনা বুলি দাবী কৰিছিল।
