বিগত কেইদিনমানৰ পৰা আমেৰিকা আৰু ভাৰতৰ সম্পৰ্কত কিছু জটিলতা আহি পৰিছে। কিয়নো আমেৰিকাৰ ৰাষ্ট্ৰপতি ড’নাল্ড ট্ৰাম্পে ভাৰতৰ ওপৰত শুল্কৰ ওপৰত শুল্ক আৰোপ কৰিছে। প্ৰথমে ট্ৰাম্পে ভাৰতৰ ওপৰত ২৫% শুল্ক আৰোপ কৰিছিল আৰু তাৰ পিছতেই ৰাছিয়াৰ পৰা তেল ক্ৰয় কৰিলে অতিৰিক্ত ২৫% জৰিমনা ঘোষণা কৰিছিল, যিটো মুঠতে ৫০ শতাংশ হৈ পৰিছে। ইয়াক ট্ৰাম্পে ২৭ আগষ্টৰ পৰা সম্পূৰ্ণৰূপে কাৰ্যকৰী কৰিব প্ৰকাশ কৰিছে।
মাৰ্কিন ৰাষ্ট্ৰপতি ড’নাল্ড ট্ৰাম্পে শুল্ক আৰোপ কৰাৰ পিছত ভাৰতে কি পদক্ষেপ ল’ব সেই সন্দৰ্ভত বহু চৰ্চা চলিছিল। এতিয়া ভাৰতেও আমেৰিকাৰ বিৰুদ্ধে প্ৰতিশোধ লোৱাৰ পৰিকল্পনা কৰিছে। তথ্য অনুসৰি, আমেৰিকাৰ পৰা অহা কিছু সামগ্ৰীৰ ওপৰত ভাৰতেও কৰ আৰোপ কৰিবলৈ সাজু হৈছে। সূত্ৰৰ পৰা পোৱা তথ্য অনুসৰি ভাৰত চৰকাৰে এই বিষয়ত গুৰুত্বসহকাৰে বিবেচনা কৰি আছে।
যদি ভাৰত চৰকাৰে এই প্ৰস্তাৱত অনুমোদন দিয়ে তেন্তে ই হ’ব আমেৰিকাৰ বিৰুদ্ধে ভাৰতৰ প্ৰথমটো ডাঙৰ পদক্ষেপ। ৩১ জুলাইত ভাৰতৰ পৰা যোৱা সকলো সামগ্ৰীৰ ওপৰত ট্ৰাম্পে ২৫% কৰ আৰোপ কৰিছিল।ইয়াৰ পিছতেই ৬ আগষ্টত ৰাছিয়াৰ পৰা তেল ক্ৰয় কৰাৰ বাবে আমেৰিকাই ভাৰতৰ ওপৰত কিছু নিষেধাজ্ঞা আৰোপ কৰিছিল আৰু শুল্ক ৫০% লৈ বৃদ্ধি কৰিছিল।
উল্লেখ্য যে, ফেব্ৰুৱাৰী মাহৰ পৰা তীখা আৰু এলুমিনিয়ামৰ ওপৰত কৰক লৈ বিবাদ হৈ আছে। তাৰ পিছত ট্ৰাম্প চৰকাৰে এই ধাতুবোৰৰ ওপৰত ২৫% কৰ আৰোপ কৰিলে। জুন মাহত এই কৰ ৫০% লৈ বৃদ্ধি কৰা হৈছিল। ইয়াৰ ফলত ভাৰতৰ প্ৰায় ৭.৬ বিলিয়ন ডলাৰৰ ৰপ্তানিত প্ৰভাৱ পৰিছে।
এক সূত্ৰই প্ৰকাশ কৰিছে যে আলোচনাৰ জৰিয়তে ভাৰতৰ উদ্বেগ সমাধান কৰিবলৈ আমেৰিকা সাজু নহয়। গতিকে প্ৰতিশোধমূলক ব্যৱস্থা লোৱাৰ বাহিৰে ভাৰতৰ হাতত আন কোনো বিকল্প নাই। সূত্ৰৰ মতে, আমেৰিকাৰ পৰা অহা কিছু সামগ্ৰীৰ ওপৰত ভাৰতে যিমান কৰ আৰোপ কৰিব, সিমানেই আমেৰিকাই ভাৰতৰ ক্ষতিসাধন কৰিব।
আমেৰিকাই ভাৰতক ৪৫ বিলিয়ন ডলাৰতকৈ অধিক মূল্যৰ সামগ্ৰী বিক্ৰী কৰে। একে সময়তে ভাৰতে আমেৰিকাক ৮৬ বিলিয়ন ডলাৰৰ সামগ্ৰী বিক্ৰী কৰিছিল যদিও নতুন কৰ আৰোপ কৰাৰ পিছত এই পৰিসংখ্যা সলনি হ’ব পাৰে। যদিহে ভাৰতে আমেৰিকাৰ ওপৰত প্ৰতিশোধ লয়, তেন্তে বাণিজ্যৰ এই ব্যৱধান আৰু অধিক বৃদ্ধি পাব পাৰে।
আচলতে ফেব্ৰুৱাৰী মাহতেই মাৰ্কিন ৰাষ্ট্ৰপতি ড’নাল্ড ট্ৰাম্প আৰু প্ৰধানমন্ত্ৰী নৰেন্দ্ৰ মোদীয়ে মিলি এই ব্যৱসায় ৫০০ বিলিয়ন ডলাৰলৈ বৃদ্ধি কৰাৰ প্ৰতিশ্ৰুতি দিছিল। কিন্তু ভাৰতৰ স্পৰ্শকাতৰ কিছু ক্ষেত্ৰত আমেৰিকাই অধিক প্ৰৱেশ বিচাৰিছিল। সেয়ে এই আলোচনা বন্ধ হৈ পৰে।
