অহা সপ্তাহৰ শেষত তিনিদিনীয়া ভ্ৰমণৰ বাবে দক্ষিণ কোৰিয়া ভ্ৰমণ কৰিব চীনৰ ৰাষ্ট্ৰপতি ছি জিনপিঙে। দক্ষিণ কোৰিয়াৰ ৰাষ্ট্ৰপতি লি জে-ম্যুঙৰ আমন্ত্ৰণত গিয়েংজুত অনুষ্ঠিত হ’বলগীয়া এছিয়া-পেচিফিক অৰ্থনৈতিক সহযোগিতা (এপেক)ৰ বৈঠকত অংশগ্ৰহণ কৰিব ৰাষ্ট্ৰপতি ছি জিনপিঙে। ২৪ অক্টোবৰত চীনে এক আনুষ্ঠানিক বিবৃতিত এই তথ্য শ্বেয়াৰ কৰে।
চীনৰ আনুষ্ঠানিক বিবৃতি অনুসৰি, চীনৰ ৰাষ্ট্ৰপতি ছি জিনপিঙেও এই সন্মিলনত আমেৰিকাৰ ৰাষ্ট্ৰপতি ড’নাল্ড ট্ৰাম্পক সাক্ষাৎ কৰিব, য’ত আমেৰিকা আৰু চীনৰ মাজত বৃদ্ধি পোৱা বাণিজ্যিক উত্তেজনা হ্ৰাস কৰাৰ বাবে দুয়োখন দেশৰ ৰাষ্ট্ৰপতিৰ মাজত গুৰুত্বপূৰ্ণ আলোচনা হ’ব বুলি আশা কৰা হৈছে।
চীনৰ বৈদেশিক মন্ত্ৰালয়ৰ মুখপাত্ৰ গুও জিয়াকুনে ২৪ অক্টোবৰত দেশৰ ৰাজধানী বেইজিঙত এখন সংবাদমেল সম্বোধন কৰে। তেওঁ কয় যে দক্ষিণ কোৰিয়াৰ ৰাষ্ট্ৰপতিৰ আমন্ত্ৰণত গ্য়ংজুত অনুষ্ঠিত হ’বলগীয়া ৩২ সংখ্যক এছিয়া-পেচিফিক অৰ্থনৈতিক সহযোগিতা (এপেক) অৰ্থনৈতিক নেতা বৈঠকত অংশগ্ৰহণ কৰিব চীনৰ ৰাষ্ট্ৰপতি ছি জিনপিঙে। ইয়াৰ বাবে অহা সপ্তাহত চীনৰ ৰাষ্ট্ৰপতিয়ে ৩০ অক্টোবৰৰ পৰা ১ নৱেম্বৰলৈ দক্ষিণ কোৰিয়া ভ্ৰমণ কৰিব।
ইফালে, দক্ষিণ কোৰিয়াত চীনৰ ৰাষ্ট্ৰপতি ছি জিনপিঙৰ সৈতে আমেৰিকাৰ ৰাষ্ট্ৰপতি ড’নাল্ড ট্ৰাম্পৰ আগন্তুক বৈঠকৰ কথা ইতিমধ্যে হোৱাইট হাউছে ঘোষণা কৰিছে। হোৱাইট হাউছে এক আনুষ্ঠানিক বিবৃতি প্ৰকাশ কৰি কয় যে, ৰাষ্ট্ৰপতি ড’নাল্ড ট্ৰাম্পে অহা সপ্তাহত ৩০ অক্টোবৰত দক্ষিণ কোৰিয়াত চীনৰ ৰাষ্ট্ৰপতি ছি জিনপিঙৰ সৈতে সাক্ষাৎ কৰিব।
ইয়াৰ উপৰিও হোৱাইট হাউছে এইটোও জনাইছে যে ট্ৰাম্প আৰু জিনপিঙৰ মাজত এই বৈঠক আমেৰিকাৰ ৰাষ্ট্ৰপতিৰ এছিয়াৰ তিনিখন দেশ- মালয়েছিয়া, জাপান আৰু দক্ষিণ কোৰিয়া ভ্ৰমণৰ শেষত হ’ব।
