শুকুৰবাৰে ৰাতিপুৱা ধেমাজি জিলাৰ বৰগাঁও ৰে’লৱে গেইটৰ সমীপৰ ৰে’ল ট্ৰেকত দুজন যুৱকৰ মৃতদেহ উদ্ধাৰ হৈছে। এই তথ্য প্ৰদান কৰিছে আৰক্ষীয়ে।
উদ্ধাৰ হোৱা যুৱক দুজনক উত্তম সোণোৱাল (২৭) আৰু অমিত সোণোৱাল (২৮) বুলি চিনাক্ত কৰা হৈছে। যুৱক দুজন মৃতদেহ উদ্ধাৰ হোৱা স্থানৰ সমীপৰে এখন গাঁৱৰ বুলি জানিব দিয়ে আৰক্ষীয়ে।
ধেমাজি ৰে’লৱে ষ্টেশ্যনৰ পৰা কিছু কিলোমিটাৰ নিলগত আজি ৰাতিপুৱা প্ৰায় ৪ বজাত ৰে’লৱে আৰক্ষীয়ে যুৱক দুজনৰ মৃতদেহ উদ্ধাৰ কৰে।
ৰে’লৰ খুন্দাত যুৱক দুজনৰ মৃত্যু হৈছে নে আন কোনো লোকে হত্যা কৰি মৃতদেহ দুটা ৰে’লৱে ট্ৰেকত পেলাই থৈ গৈছে তাৰ তদন্ত আৰম্ভ কৰিছে আৰক্ষীয়ে। উত্তৰ-পূব সীমান্ত ৰে’লৱেৰ এগৰাকী শীৰ্ষ বিষয়াই এই কথা জনায়।
ইফালে, অত্যধিক সুৰা পান কৰাৰ ফলত যুৱক দুজনে দুৰ্ভাগ্যজনকভাৱে মৃত্যুক আকোৱালি লোৱা বুলি সন্দেহ প্ৰকাশ কৰিছে ধেমাজি আৰক্ষী অধীক্ষক হিতেশ চন্দ্ৰ ৰয়ে। অৱশ্যে মৰণোত্তৰ পৰীক্ষাৰ অন্ততহে প্ৰকৃত ৰহস্য পোহৰলৈ আহিব বুলিও তেওঁ লগতে জনায়।
আনহাতে ৰে’লৱে বিভাগৰ শীৰ্ষ বিষযা এগৰাকীয় জনোৱা অনুসৰি, যুৱক দুজনৰ মৃতদেহ উদ্ধাৰ হোৱাৰ কিছু সময় পূৰ্বে সেই স্থানেৰে পাৰ হৈছিল কামৰূপ এক্সপ্ৰেছ। অৱশ্যে ৰে’লখনৰ খুন্দাতেই যুৱক দুজনৰ মৃত্যু হৈছে নে কি সেয়া নিশ্চিত নহয় ৰে’লৱে বিভাগ।
