ভাৰতৰ ভূমিত অনুষ্ঠিত হ’বলগীয়া আই চি চি বিশ্বকাপ মহিলা প্ৰতিযোগিতাৰ বাবে ভাৰতীয় দলত স্থান লাভ কৰিছে অসমৰ উমা চেত্ৰীয়ে। আঘাতৰ বাবে সন্মানীয় প্ৰতিযোগিতাখনৰ পৰা ষ্টাৰ বেটাৰ য়াস্তিকা ভাটিয়া বাহিৰ হোৱাত অসম কন্যা উমা চেত্ৰীয়ে দলত সুযোগ লাভ কৰিলে।
৩০ ছেপ্তেম্বৰৰ পৰা আৰম্ভ হ’বলগীয়া এই প্ৰতিযোগিতাখনৰ বাবে ভাৰতীয় দলত সুযোগ পোৱা উমা চেত্ৰী হৈছে বিশ্বকাপ ক্ৰিকেটত অংশ ল’বলগীয়া প্ৰথমগৰাকী অসমীয়া খেলুৱৈ।
অসম কন্যা উমা চেত্ৰীয়ে ভাৰতৰ হৈ এইপৰ্যন্ত ৭খন আন্তঃৰাষ্ট্ৰীয় টি-২০ মেচ খেলিছে। অৱশ্যে তেওঁ এই পৰ্যন্ত এদিনীয়া মেচত ভাৰতৰ হৈ খেলাৰ সুযোগ লাভ কৰা নাই।
মহিলা ক্ৰিকেট বিশ্বকাপৰ পূৰ্বে অষ্ট্ৰেলিয়াৰ বিৰুদ্ধে অনুষ্ঠিত হ’বলগীয়া এদিনীয়া শৃংখলাৰ বাবেও ভাৰতীয় দলত ভাটিয়াৰ ঠাইত অংশ ল’ব চেত্ৰীয়ে।
বিশ্বকাপৰ বাবে ভাৰতীয় মহিলা দলত উমা চেত্ৰীয়ে স্থান লাভ কৰাত অসমৰ ক্ৰিকেট অনুৰাগী যথেষ্ট উৎফুল্লিত হৈ পৰা পৰিলক্ষিত হৈছে।
উল্লেখ্য যে, এই প্ৰতিযোগিতাৰ উদ্বোধনী মেচখন অনুষ্ঠিত হ’ব গুৱাহাটীত। বৰ্ষাপাৰা ক্ৰিকেট ষ্টেডিয়ামত অনুষ্ঠিত হ’বলগীয়া বিশ্বকাপৰ প্ৰথমখন মেচত ভাৰতৰ মুখামুখি হ’ব শ্ৰীলংকা।
বিশ্বকাপৰ বাবে ঘোষণা কৰা ভাৰতীয় দলটো
হৰমনপ্ৰীত কৌৰ (অধিনায়ক), স্মৃতি মান্ধানা (উপ-অধিনায়ক), প্ৰতিকা ৰাৱাল, হৰলীন দেউল, দীপ্তি শৰ্মা, জেমিয়াহ ৰড্ৰিগেছ, ৰেনুকা সিং ঠাকুৰ, অৰুন্ধতি ৰেড্ডী, ৰিচা ঘোষ (উইকেট কীপাৰ), ক্ৰান্তি গাউড, অমজোত কৌৰ, ৰাধা যাদৱ, শ্ৰী চৰণি, স্নেহ ৰানা আৰু উমা চেত্ৰী।
