কেন্দ্ৰীয় বিত্তমন্ত্ৰী নিৰ্মলা সীতাৰমণে কেন্দ্ৰীয় বাজেটৰ লগতে দাখিল কৰিব ৰে’ল বাজেট। ২৩ জুলাইত কেন্দ্ৰীয় বাজেট ২০২৪-২৫ বৰ্ষৰ ভাষণৰ সময়ত ঘোষণা কৰা হ’ব ৰে’ল বাজেট।
পুৱা ১১ বজাৰ পৰা আৰম্ভ হ’ব বাজেট ভাষণ। এইবাৰো ৰে’ল বাজেটত জনসাধাৰণৰ বহু আশা আৰু দৃষ্টি নিৱদ্ধ হৈ আছে।
কেন্দ্ৰীয় বাজেট ২০২৪ত ভাৰতীয় অৰ্থনীতিৰ তিনিটা মূল খণ্ডৰ ভিতৰত অন্যতম ৰে’ল উদ্যোগক যথেষ্ট গুৰুত্ব দিয়া হ’ব বুলি আশা কৰা হৈছে।
এইবাৰ ৰে’ল বাজেটত ভাৰতীয় ৰে’লৱেৰ টিকট সস্তা কৰি তোলা, ৰে’লৰ সংখ্যা বৃদ্ধি কৰা, যাত্ৰীৰ সুৰক্ষা আৰু ক্ষমতাৰ প্ৰতি অধিক গুৰুত্ব দিয়া, যাত্ৰা সুবিধাজনক কৰি তোলাৰ ওপৰত গুৰুত্ব দিয়া হ’ব বুলি অনুমান কৰা হৈছে।
ইয়াৰ উপৰি ৰে’ল বাজেটত গ্ৰাহককেন্দ্ৰিক বিষয়সমূহক গুৰুত্ব দিয়া হ’ব। এইবাৰৰ ৰে’ল বাজেটত আটাইতকৈ ডাঙৰ বিষয় হ’ব পাৰে ৰে’ল দুৰ্ঘটনা।
২০২৪ চনৰ বাজেটত ৰে’ল খণ্ডৰ বহু দিশত বিশেষ গুৰুত্ব দিয়াৰ সম্ভাৱনা আছে। ২০২৪ চনৰ অন্তৱৰ্তীকালীন বাজেটত ২০২৪-২৫ বিত্তীয় বৰ্ষৰ বাবে ৰে’ল মন্ত্ৰালয়ক ২.৫৫ লাখ কোটি টকা আবণ্টন দিয়া হৈছিল।
কিন্তু প্ৰতিবেদন অনুসৰি আগন্তুক বাজেটত এই আবণ্টন যথেষ্ট বৃদ্ধি পোৱাৰ সম্ভাৱনা আছে। এই আবণ্টন ৩ লাখ কোটি টকা হ’ব পাৰে, যিটো এই খণ্ডৰ বাবে এতিয়ালৈকে সৰ্বাধিক আবণ্টন হ’ব।
