২০২৪ চনৰ ২৪ নৱেম্বৰত উত্তৰ প্ৰদেশৰ সম্ভলত সংঘটিত হয় এক হিংসাত্মক ঘটনা। এই ঘটনা সন্দৰ্ভত আৰক্ষীয়ে শ্বৰিক সাথা চক্ৰৰ গুৰুত্বপূৰ্ণ সদস্য মহম্মদ গুলামক গ্ৰেপ্তাৰ কৰে।
ডুবাইৰ পৰা এই হিংসাত্মক ঘটনা সংঘটিত কৰা শ্বৰিক সাথা গেঙৰ সৈতে জড়িত হৈ আছিল গুলাম। আৰক্ষীয়ে এই হিংসাত্মক ঘটনাত শ্বৰিক সাথাৰ গেং জড়িত হৈ থকা বুলি উদঙাই দি ডুবাইত এই সকলো চক্ৰান্ত ৰচনা কৰা হৈছে বুলি জানিবলৈ দিয়ে।
শ্বৰিক সাথা গেঙ বিভিন্নধৰণৰ বৃহৎ অপৰাধৰ সৈতে জড়িত। আৰক্ষীৰ মতে, শ্বৰিক সাথা ডাউদ ইব্ৰাহিম গেঙৰ সৈতে জড়িত।
২০১৮ চনত জেলৰ পৰা মুক্তি পোৱাৰ পিছত ভুৱা পাছপ’ৰ্ট লৈ ডুবাইলৈ পলায়ন কৰিছিল শ্বৰিক সাথাই। সম্ভল হিংসাৰ সময়ত ৪ জনৰ প্ৰাণহানিৰ লগতে আহত হয় বহু লোক। এই হিংসাৰ সৈতে জড়িত ৭৯ জন অভিযুক্তৰ বিৰুদ্ধে আদালতত অভিযোগনামা দাখিল কৰে আৰক্ষীয়ে।
ইতিমধ্যে আৰক্ষীয়ে এই হিংসাত ব্যৱহৃত বিদেশী পিষ্টল আৰু কাৰ্টিজ উদ্ধাৰ কৰিছে। আৰক্ষীৰ তথ্য অনুসৰি, শ্বৰিক সাথা চক্ৰৰ পৰিকল্পনাৰে ডুবাইৰ পৰা নিৰ্দেশিত হয় এই হিংসাত্মক ঘটনা।
আৰক্ষী অধীক্ষক কৃষ্ণ কুমাৰ বিষ্ণৌই কয় যে, শ্বৰিক সাথা সম্ভল সাংসদ জিয়াউৰ ৰহমান বৰ্কৰ সুৰক্ষাত নিয়োজিত হৈ আছিল। সম্ভলৰ এই হিংসাত গুৰুত্বপূৰ্ণ ভূমিকা গ্ৰহণ কৰা গুলামক আৰক্ষীয়ে গ্ৰেপ্তাৰ কৰে। গুলামৰ পৰা আৰক্ষীয়ে উদ্ধাৰ কৰে বিদেশী পিষ্টল আৰু কাৰ্টিজ। ইয়াৰ উপৰিও গুলামে অধিবক্তা বিষ্ণু শংকৰ জৈনক হত্যাৰ ষড়যন্ত্ৰ ৰচনা কৰা বুলিও আৰক্ষীয়ে জানিবলৈ দিয়ে।
এই তথ্য প্রকাশৰ পাছতে আৰক্ষীয়ে ৮০জন দুষ্কৃতিকাৰীক আটক কৰি এই হিংসাত্মক কার্যত জড়িত অভিযুক্তৰ বিৰুদ্ধে ব্যৱস্থা গ্রহণ কৰিছে৷ সম্ভল হিংসাত বহুলোকৰ প্ৰাণহানি হোৱা আৰু আহত হোৱাৰ পিছতে আৰক্ষীয়ে এই বিষয়টো গুৰুত্বসহকাৰে লৈ বৃহৎ চক্ৰটোৰ ষড়যন্ত্ৰৰ বিষয়ে উদঙাই দিয়ে।
