ৰাজস্থান ৰয়েলছৰ বিৰুদ্ধে খেলিবলগীয়া অত্যন্ত গুৰুত্বপূৰ্ণ মেচখনৰ পূৰ্বে সমস্যাই দেখা দিছে মুম্বাই ইণ্ডিয়ানছ শিৱিৰত। আঘাতৰ বাবে প্ৰতিযোগিতাখনৰ বাকী থকা মেচৰ পৰা বাহিৰ হ’ল প্ৰতিভাৱান বাঁওহতীয়া স্পিনাৰ বিগ্নেশ পুথুৰ।
ফ্ৰেঞ্চাইজিটোৱে পুথুৰৰ ঠাইত আন এগৰাকী আনকেপড লেগস্পিনাৰ ৰঘু শৰ্মাক চুক্তিবদ্ধ কৰিছে। বৃহস্পতিবাৰে এই তথ্য প্ৰদান কৰে ফ্ৰেঞ্চাইজিটোৱে। ৩০ লাখ টকাৰ ভিত্তি মূল্যত আৰ এ পি পি তালিকাৰ পৰা তেওঁক চুক্তিবদ্ধ কৰা হৈছে।
ৰঘু শৰ্মা কোন?
১৯৯৩ চনৰ ১১ মাৰ্চত পঞ্জাৱৰ জলন্ধৰত জন্মগ্ৰহণ কৰা ৰঘু সোঁহতীয়া লেগ ব্ৰেক বলাৰ। তেওঁ ঘৰুৱা ক্ৰিকেটত পঞ্জাব আৰু পুডুচেৰীক প্ৰতিনিধিত্ব কৰি আহিছে। প্ৰথম শ্ৰেণীৰ ১১খন মেচত তেওঁ ১৯.৫৯ গড়ে ৫৭টা উইকেট দখল কৰিছে, য’ত তেওঁৰ শ্ৰেষ্ঠ বলিং প্ৰদৰ্শন হৈছে ৭/৫৬। লিষ্ট এ ক্ৰিকেটত তেওঁ ৯খন মেচত ১৪টা উইকেট দখল কৰিছে, য’ত তেওঁৰ সৰ্বোত্তম প্ৰদৰ্শন হৈছে ৪/৩৭। লগতে ৩ খন টি-২০ মেচত অংশ লৈ ৩ টা উইকেট দখল কৰিছে।
