টুৱেল্ভ ফেইল ছবিৰ জৰিয়তে ব্যাপক জনপ্ৰিয়তা অৰ্জন কৰা বিক্ৰান্ত মেছিয়ে শেহতীয়াকৈ ইনষ্টাগ্ৰামৰ জৰিয়তে কৰা এটা পোষ্টে অনুৰাগীৰ হৃদয় ভাঙিছে। মাত্ৰ ৩৭ বছৰ বয়সতে অভিনয় জগতক বিদায় জনোৱাৰ কথা ঘোষণা কৰিছে অভিনেতাজনে।
ছেক্টৰ ৩৬ আৰু হাছিন দিলৰুবাৰ দৰে হিট ছবি দিয়া বিক্ৰান্ত মেছিয়ে ২ ডিচেম্বৰৰ পুৱা অভিনয় কেৰিয়াৰৰ পৰা অৱসৰ ল’ব বুলি ইনষ্টাগ্ৰামৰ জৰিয়তে কৰা ঘোষণাই সকলোকে আচৰিত কৰি তুলিছে।
অভিনেতাজনে ইনষ্টাগ্ৰামত পোষ্ট কৰাৰ লগে লগে তেওঁৰ অনুৰাগী তথা বলিউদৰ চেলিব্ৰেটিসকলে মত ব্যক্ত কৰা আৰম্ভ কৰিছে। সম্প্ৰতি অভিনেতাজনৰ পোষ্টটো ব্যাপকৰূপত ভাইৰেল হৈ আছে।
অভিনেতাজনে হাৰ্ট আৰু হাতজোৰ কৰা ইমোজিৰে লিখিছে যে যোৱা কিছু বছৰ আৰু তাৰ পিছৰ সময়খিনি অদ্ভুট আছিল। মোক সমৰ্থন জনোৱা প্ৰতিগৰাকী লোককে ধন্যবাদ জ্ঞাপন কৰিছো।
এজন স্বামী, পিতৃ, পুত্ৰ আৰু অভিনেতাৰূপে তেওঁ নিজৰ ঘৰলৈ উভতি যোৱাৰ সময় আহিছে বুলিও পোষ্টটোত উল্লেখ কৰে অভিনেতাজনে।
উল্লেখ্য যে, সম্প্ৰতি অভিনেতা বিক্ৰান্তে দুখন ছবিত কাম কৰি আছে। এই ছবি দুখন হৈছে ‘য়াৰ জিগৰি’ আৰু ‘আখো কি গুস্তাখিয়া’। আহিবলগীয়া প্ৰজেক্ট সন্দৰ্ভত অভিনেতাজনে উল্লেখ কৰে, ‘গতিকে ২০২৫ চনত আমি ইজনে সিজনক শেষবাৰৰ বাবে লগ পাম। যেতিয়ালৈকে সময় সঠিক নহয়। আগন্তুক ২ খন ছবি আৰু বহু বছৰৰ স্মৃতি। আকৌ এবাৰ ধন্যবাদ।’
অভিনেতাজনে সদায় ঋণী হৈ থাকিব বুলি লিখি পোষ্টটোৰ অন্ত পেলাই। অভিনেতাজনৰ এই পোষ্টটোৰ পিছতে বিভিন্ন অনুৰাগীয়ে প্ৰতিক্ৰিয়া প্ৰকাশ কৰা পৰিলক্ষিত হৈছে।
