চেম্পিয়নছ ট্ৰফীত পাকিস্তানৰ বিৰুদ্ধে অৱতীৰ্ণ হ’বলগীয়া গুৰুত্বপূৰ্ণ মেচখনৰ এদিন পূৰ্বে ডুবাইৰ আই চি চি একাডেমীত টিম ইণ্ডিয়াই অনুশীলন কৰে। দলটোৰ সতীৰ্থ খেলুৱৈসকলৰ ঠিক এঘণ্টা পূৰ্বেই অনুশীলনস্থলীত উপস্থিত হয় বিৰাট কোহলী।
তেওঁ নেটত যথেষ্ট সময় অনুশীলন কৰা দেখা গৈছিল যদিও এই সময়ছোৱাত এটা বল তেওঁৰ ভৰিত খুন্দা মাৰে যাৰ পিছত তেওঁক ভৰিত বৰফৰ পেক লগোৱা দেখা গৈছিল।
ভাৰত-পাকিস্তানৰ খেলৰ পূৰ্বে শনিবাৰে কঠোৰ অনুশীলন কৰে ভাৰতীয় দলটোৱে। বহু খেলুৱৈয়ে সময়ৰ আগতেই খেলপথাৰত উপস্থিত হৈ বিৰাটৰ সৈতে অনুশীলন আৰম্ভ কৰিছিল। বিৰাট কোহলীৰ ভৰিত বলে আঘাত কৰাৰ পিছতেই তেওঁ খেলপথাৰ ত্যাগ কৰে। ভৰিত বৰফৰ পেক এটা লৈ বাউণ্ডেৰী লাইনত দেখা গৈছিল।
অৱশ্যে কিছু সময়ৰ পাছত পুনৰ অনুশীলনৰ বাবে খেলপথাৰলৈ উভতি আহে কোহলী। অৱশ্যে সকাহৰ কথা হ’ল কোহলীৰ আঘাত গুৰুতৰ নহয়। সকলোৱে আশা কৰিছে যে কাইলৈৰ খেলখনৰ বাবে কোহলী সম্পূৰ্ণৰূপে উপলব্ধ হ’ব।
চেম্পিয়নছ ট্ৰফীৰ পূৰ্বে ইংলেণ্ডৰ বিৰুদ্ধে অনুষ্ঠিত হোৱা এদিনীয়া শৃংখলাৰ প্ৰথমখন মেচৰ পৰা বাহিৰ হৈ আছিল বিৰাট কোহলী। সেই সময়ত তেওঁ আঁঠুৰ আঘাতৰ বাবে খেলা নাছিল।
উল্লেখ্য যে, দীৰ্ঘদিনৰ পৰা ফৰ্মহীনতাত ভুগি থকা বিৰাট কোহলীৰ বাবে কাইলৈৰ মেচখন হ’ব অতি গুৰুত্বপূৰ্ণ। মেচখনত ভাৰতে জয়ী হ’বলগীয়া হ’লে কোহলীৰ বেটেৰে আহিব লাগিব এটা ভাল ইনিংছ।
অৱশ্যে পাকিস্তানৰ বিৰুদ্ধে বিৰাট কোহলীৰ প্ৰদৰ্শন আশাব্যঞ্জক। এদিনীয়া ক্ৰিকেটত কোহলীয়ে পাকিস্তানৰ বিৰুদ্ধে ১৬ খন মেচত ৩টা শতকীয় ইনিংছ আৰু দুটা অৰ্ধশতকৰ সহায়ত ৬৭৮ ৰান সংগ্ৰহ কৰিছে।
