আজি বিশ্বখনিকৰ বিশ্বকৰ্মা পূজা। বিশ্বকৰ্মাক বেদত জগতৰ সৃষ্টিকৰ্তা বুলি বৰ্ণনা কৰা হৈছে। ভাদমাহৰ সংক্ৰান্তিত অনুষ্ঠিত কৰা বিশ্বকৰ্মা পূজা হৈছে হিন্দুসকলৰ এক ধৰ্মীয় উৎসৱ। এই পূজা ঐশ্বৰিক শিল্পী বিশ্বকৰ্মাৰ আশীৰ্বাদ বিচাৰি আয়োজন কৰা হয়।
জনবিশ্বাস অনুসৰি, এই দেৱশিল্পীয়ে নিৰ্মাণ কৰিছিল ইন্দ্ৰপুৰি, স্বৰ্গলোক, যমপুৰি আদি দৃষ্টিনন্দন ৰৈম্যপীঠ। সেই অনুসৰিয়েই অতীজৰে পৰা নিৰ্মাণ-সৃজনৰ দেৱতা ৰূপে বিশ্বকৰ্মাৰ পূজা কৰি আহিছে।
উল্লেখ্য যে, পুৰীৰ জগন্নাথ মন্দিৰৰ অৰ্ধ নিৰ্মিত জগন্নাথ, বলভদ্ৰ আৰু সুভদ্ৰাৰ মূৰ্তিৰো খনিকৰ আছিল বিশ্বকৰ্মা। বিশ্বকৰ্মা পুৰাণ অনুসৰি নাৰায়ণে প্ৰথমে ব্ৰহ্মা আৰু তাৰ পাছত বিশ্বকৰ্মাক সৃষ্টি কৰিছিল। বিশ্বকৰ্মা নামৰ অৰ্থই হৈছে বিশ্বব্ৰহ্মাণ্ডৰ স্থাপতি। বিশ্বকৰ্মাই সৃজনীশীল শক্তিৰ বলত গোটেই বিশ্বকেই ধৰি ৰাখিছে।
ঋকবেদৰ মতে, বিশ্বকৰ্মাই সৃজনশীল শক্তিৰ বলত গোটেই বিশ্বক ধৰি ৰাখিছে। তেওঁক দৈৱিক স্থাপত্যবিদ, অভিযন্তা আৰু বিশ্বৰ সৃষ্টকৰ্তা হিচাপে গণ্য কৰা হয়। সেয়ে তেওঁক দেৱতাৰ শিল্পী তথা দেৱশিল্পী হিচাপে অভিহিত কৰা হয়।
বিশ্বকৰ্মা পূজা মূলতে ভাৰতৰ অসম, কৰ্ণাটক, পশ্চিমবংগ, বিহাৰ, ঝাৰখণ্ড, উৰিষ্যা আৰু ত্ৰিপুৰাকে ধৰি কেইবাখনো ৰাজ্যত৷ হিন্দু ধৰ্মৰ মতে, নিৰ্মাণ আৰু সৃষ্টিৰ ক্ষেত্ৰখনত দেৱশিল্পীৰ আশীষ অবিহনে অভিষ্ট সিদ্ধি নহয়। এই বিশ্বাসক সৰোগত কৰিয়েই তাহানিৰে পৰা চলি আহিছে বিশ্ব খনিকৰৰ পূজা-অৰ্চনা। আজি বিশ্বকৰ্মা পূজা উদযাপনৰ বাবে ৰাজ্যৰ বিভিন্ন চৰকাৰী-বেচৰকাৰী কাৰ্যালয়, প্ৰতিষ্ঠান, কল-কাৰখানা আদি সকলো অনুষ্ঠান-প্ৰতিষ্ঠান সুন্দৰকৈ সজাই-পৰাই তোলা হৈছে।
