দেশজুৰি ৱাকফ সন্দৰ্ভত মুছলমান সমাজ আৰু ৰাজনৈতিক দলসমূহে কৰি থকা প্ৰতিবাদৰ মাজতে মুছলিম ৰাষ্ট্ৰীয় মঞ্চই ঘোষণা কৰিছে যে এই বিষয়ত জনসাধাৰণৰ মাজত থকা ভুল ধাৰণা আঁতৰাবলৈ সমগ্ৰ দেশতে ১০০ৰো অধিক সংবাদমেল আৰু ৫০০ৰো অধিক আলোচনা চক্ৰৰ আয়োজন কৰিব লাগিব।
মুছলিম ৰাষ্ট্ৰীয় মঞ্চৰ উদ্যোগত আয়োজিত ঈদ মিলান অনুষ্ঠানত দেশৰ বিভিন্ন প্ৰান্তৰ নেতা, বুদ্ধিজীৱী, সমাজকৰ্মী আৰু ধৰ্মগুৰুসকলে ৱাকফ সংশোধনী আইন সম্পৰ্কে আলোচনা কৰি ইয়াক মুছলমান সমাজৰ বাবে এক ঐতিহাসিক আৰু পৰিৱৰ্তনশীল পদক্ষেপ বুলি অভিহিত কৰে।
এই অনুষ্ঠানত মুছলিম ৰাষ্ট্ৰীয় মঞ্চৰ গাইড ইন্দ্ৰেশ কুমাৰ, বিজেপিৰ সাংসদ জগদাম্বিকা পাল, আৰ এছ এছৰ যোগাযোগ প্ৰমুখ ৰামলাল, সংখ্যালঘু শিক্ষানুষ্ঠানৰ ৰাষ্ট্ৰীয় আয়োগৰ কাৰ্যবাহী অধ্যক্ষ ড০ শ্বাহিদ আখতাৰ, মুছলিম ৰাষ্ট্ৰীয় মঞ্চৰ ৰাষ্ট্ৰীয় আহ্বায়ক ড০ শালিনী আলী, দিল্লী ৱাকফ ব’ৰ্ডৰ প্ৰাক্তন সদস্য মহম্মদ আফজাল, ফাৰুক খান আদি উপস্থিত থাকে।
মুছলিম নেচনেল ফ’ৰামৰ গাইড ইন্দ্ৰেশ কুমাৰে কয় যে, ৱাকফ সংশোধনী বিধেয়ক সন্দৰ্ভত বিয়পি পৰা ভুল ধাৰণা আৰু উৰাবাতৰি শিপাই নোহোৱা কৰিবলৈ চেষ্টা কৰা হ’ব। ইন্দ্ৰেশ কুমাৰে ঘোষণা কৰে যে, মুছলিম ৰাষ্ট্ৰীয় মঞ্চই সমগ্ৰ দেশতে ১০০ খনতকৈও অধিক সংবাদমেল আৰু ৫০০ৰো অধিক আলোচনা চক্ৰৰ আয়োজন কৰিব। এই আইনখনৰ উদ্দেশ্য আৰু লাভালাভ প্ৰতিগৰাকী ব্যক্তিৰ মাজত বিয়পাই দিব।
ইন্দ্ৰেশ কুমাৰে লগতে কয় যে, এই আইনখনে মুছলমান সম্প্ৰদায়ৰ আত্মসন্মান, ন্যায় আৰু সমতাৰ অধিকাৰ আৰু অধিক শক্তিশালী কৰিব। লগতে কয় যে এই আইনখন কাৰো বিৰুদ্ধ নহয়, বৰঞ্চ সকলোৰে স্বাৰ্থত ই ভাৰতীয় সমাজত পাৰস্পৰিক বিশ্বাস আৰু সহযোগিতা বৃদ্ধি কৰিব।
আৰ এছ এছৰ যোগাযোগ প্ৰমুখ ৰামলালে ৱাকফ সংশোধনী বিলক মুছলমান সমাজৰ আস্থা আৰু সম্প্ৰীতি বৃদ্ধিৰ দিশত এক গুৰুত্বপূৰ্ণ পদক্ষেপ বুলি অভিহিত কৰে। তেওঁ লগতে কয় যে, এই পৰিৱৰ্তনে ভাৰতীয় সমাজখনক নতুন শক্তি প্ৰদান কৰিব আৰু ‘সবকা সাথ, সবকা বিকাশ, সবকা বিশ্বাস’ মন্ত্ৰ কাৰ্যকৰী কৰাত গুৰুত্বপূৰ্ণ ভূমিকা পালন কৰিব। ৰামলালে লগতে কয় যে, ৱাকফ সংশোধনী কেৱল আইনী পৰিৱৰ্তন নহয় বৰঞ্চ সামাজিক আৰু নৈতিক সংস্কাৰৰ দিশত এক বৃহৎ পদক্ষেপহে।
