বিশ্বজুৰি ভাইৰাছৰ সংক্ৰমণৰ প্ৰতি উদ্বেগ পুনৰ বৃদ্ধি পাইছে। শেহতীয়াকৈ ক্ৰুজ জাহাজত হান্টাভাইৰাছ আক্ৰান্তৰ আৱিষ্কাৰৰ পিছতে বিশ্ব স্বাস্থ্য সংস্থাই ইয়াক গুৰুতৰ সংক্ৰামক ৰোগ বুলি ঘোষণা কৰিছে। যদিও WHO য়ে স্পষ্ট কৰি দিছে যে এইয়া “পৰৱৰ্তী ক’ভিড” নহয়, কিন্তু ইয়াক সহজভাৱে লোৱাটো বিপদজনক হৈ উঠিব পাৰে।
বিশ্ব স্বাস্থ্য সংস্থাৰ মহামাৰী বিজ্ঞানী মাৰিয়া ভান কেৰখ’ভেৰ মতে, হান্টাভাইৰাছ নতুন সংক্ৰমণ নহয় আৰু বহু বছৰ ধৰি বিশ্বত উপস্থিত হৈ আহিছে। শেহতীয়াকৈ ক্ৰুজ জাহাজত মৃত্যু হোৱা ঘটনাই কেইবাখনো দেশক সতৰ্ক কৰি দিছে।
WHO ৰ তথ্য অনুসৰি, এই সংক্ৰমণৰ ফলত প্ৰথম মৃত্যু হয় ১১ এপ্ৰিলত। মৃত ব্যক্তিজন আছিল ৭০ বছৰীয়া ডাচ নাগৰিক। পিছত তেওঁৰ পত্নীৰ দক্ষিণ আফ্ৰিকাত মৃত্যু হয়। এগৰাকী জাৰ্মান মহিলাও আক্ৰান্ত হোৱাটো নিশ্চিত হোৱাৰ ফলত বিশ্ব স্বাস্থ্য সংস্থাই ১২খন দেশলৈ সতৰ্কবাণী জাৰি কৰে।
হান্টাভাইৰাছ হৈছে প্ৰধানকৈ এন্দুৰৰ দ্বাৰা বিয়পা সংক্ৰমণ। এই ভাইৰাছ এন্দুৰৰ মল, প্ৰস্ৰাৱ, লেলাউটিৰ সংস্পৰ্শৰ দ্বাৰা মানুহলৈ বিয়পে। কেতিয়াবা, শুকান মল আৰু প্ৰস্ৰাৱৰ কণাবোৰ বায়ুমণ্ডলীয় হৈ উশাহ-নিশাহৰ জৰিয়তে শৰীৰত প্ৰৱেশ কৰে।
এই ভাইৰাছটো মানুহৰ মাজত পোনপটীয়াকৈ বিয়পি পৰে অতি কমেইহে, ক’ভিড-১৯ৰ দৰে মানুহৰ পৰা মানুহলৈ দ্ৰুতগতিত বিয়পি পৰা কৰ’না ভাইৰাছৰ দৰে নহয়। এই কাৰণেই কৰ’না ভাইৰাছ বিশ্বব্যাপী মহামাৰীত পৰিণত হৈছে, আনহাতে হান্টাভাইৰাছৰ সংক্ৰমণ সীমিত হৈয়ে আছে।
- হান্টাভাইৰাছৰ লক্ষণ-
প্ৰথম অৱস্থাত ইয়াৰ লক্ষণসমূহ সাধাৰণ জ্বৰৰ সৈতে মিল খায়, য’ত অন্তৰ্ভুক্ত:
- তীব্ৰ জ্বৰ
- শৰীৰৰ বিষ
- ভাগৰ
- মূৰৰ বিষ
সংক্ৰমণ বৃদ্ধি পোৱাৰ লগে লগে এই অৱস্থা গুৰুতৰ হ’ব পাৰে। ৰোগীয়ে উশাহ-নিশাহ লোৱাত অসুবিধা পোৱা, হাওঁফাওঁত তৰল পদাৰ্থ জমা হোৱা, বৃক্কৰ সমস্যা আদি অনুভৱ কৰিব পাৰে। কিছুমান ক্ষেত্ৰত হাওঁফাওঁৰ পৰা তেজ ওলোৱাও দেখা গৈছে।
বৰ্তমান ভাৰতত হান্টাভাইৰাছ সন্দৰ্ভত কোনো ডাঙৰ ভাবুকি বা সতৰ্কতা নাই। অৱশ্যে ইয়াৰ পূৰ্বেও দেশত কিছুসংখ্যক ৰোগী ধৰা পৰিছে। সংবাদ মাধ্যমৰ বাতৰি আৰু গৱেষণা পত্ৰ অনুসৰি ২০০৮ চনত ভেলোৰত সংক্ৰমণৰ ঘটনা প্ৰকাশ পাইছিল।২০১৬ চনত মুম্বাইত এটি শিশুৰ মৃত্যুও এই ভাইৰাছৰ সৈতে জড়িত আছিল।
- কেনেকৈ প্ৰতিৰোধ কৰিব পাৰি?
বিশেষজ্ঞসকলৰ মতে হান্টাভাইৰাছ প্ৰতিৰোধৰ বাবে পৰিষ্কাৰ-পৰিচ্ছন্নতা অতি গুৰুত্বপূৰ্ণ। বিশেষকৈ:
- ঘৰ আৰু চৌপাশ পৰিষ্কাৰ কৰি ৰখা
- নিগনিৰ পৰা দূৰত্ব বজাই ৰখা
- বন্ধ বা লেতেৰা ঠাই চাফা কৰাৰ সময়ত মাস্ক পৰিধান কৰিব লাগে
- নিয়মিতভাৱে হাত ধুব লাগে
- আক্ৰান্ত জীৱ-জন্তুৰ সংস্পৰ্শৰ পৰা বিৰত থাকিব লাগে
ডব্লিউ এইচ অ’ৰ মুৰব্বী টেড্ৰ’ছ আধানম গেব্ৰেইছাছৰ মতে, যিবোৰ দেশৰ নাগৰিক আক্ৰান্ত ক্ৰুজ জাহাজৰ সৈতে জড়িত আছিল, সেইবোৰ দেশৰ ভিতৰত কানাডা, জাৰ্মানী, যুক্তৰাজ্য, আমেৰিকা, ছিংগাপুৰকে ধৰি ১২খন দেশ অন্তৰ্ভুক্ত। বিশেষজ্ঞসকলে কয় যে এই সময়ত আতংকিত হোৱাৰ প্ৰয়োজন নাই যদিও অসাৱধানতাও কৰা উচিত নহয়।
