পেহেলগাম সন্ত্ৰাসবাদী আক্ৰমণক লৈ যুদ্ধ সদৃশ পৰিস্থিতিৰ সৃষ্টি হৈছে ভাৰত-পাকিস্তানত। ২৬ গৰাকীকৈ নিৰীহ লোকক নৃশংসভাৱে হত্যা কৰাৰ পিছৰে পৰা পাকিস্তানৰ বিৰুদ্ধে এটাৰ পিছত আন এটা কঠোৰ পদক্ষেপ গ্ৰহণ কৰিছে ভাৰত চৰকাৰে।
ভাৰতত থকা পাকিস্তানী নাগৰিকক চিনাক্ত কৰি এজন এজনকৈ বহিষ্কাৰ কৰাৰ লগতে দেশখনৰ বিৰুদ্ধে সকলো ধৰণৰ বাণিজ্যিক ব্যৱসায়ো বন্ধ কৰি দিছে ভাৰতে।
ইয়াৰ উপৰি ভাৰতৰ প্ৰায়বোৰ ৰাজ্যতে পাকিস্তানী নাগৰিকৰ পৰিচয় উদ্ধাৰ কৰি বিতাড়ণৰ ব্যৱস্থা গ্ৰহণ কৰি থকা হৈছে।
ইয়াৰ মাজতে বিজেপি নেত্ৰী অগ্নিমিত্ৰা পলে পশ্চিম বংগ চৰকাৰৰ বিৰুদ্ধে অভিযোগ উত্থাপন কৰি কয় যে পেহেলগাম সন্ত্ৰাসবাদী আক্ৰমণত ২৬ জনকৈ লোকৰ মৃত্যু হোৱাৰ পিছত ভাৰত চৰকাৰৰ গৃহ মন্ত্ৰালয়ৰ তৰফৰ পৰা জাননী জাৰি কৰা হৈছিল যে সমগ্ৰ ভাৰতত, সকলো ৰাজ্যতে য’ত য’ত পাকিস্তানী নাগৰিকে নথি পত্ৰ বা বিনা নথিৰে বৈধ বা অবৈধভাৱে বসবাস কৰি আছে তেওঁলোকক শীঘ্ৰে চিনাক্ত কৰি ভাৰতৰ পৰা বাহিৰ কৰি দিব লাগে।
অগ্নিমিত্ৰা পলে কয় যে এই সন্দৰ্ভত সকলো ৰাজ্যতে ব্যৱস্থা গ্ৰহণ কৰা হৈছে যদিও পশ্চিম বংগত একো ব্যৱস্থা গ্ৰহণ কৰা হোৱা নাই। মমতা বেনাৰ্জীয়ে যিদৰে তুষ্টিকৰণৰ ৰাজনীতি কৰে তাত আমি অতিশয় আতংকিত হৈছো আৰু এই বংগত আই এছ এছ হওক, আনছাৰুল বাংলা হওক, অল কায়দা হওক, পশ্চিমবংগত সকলো ইছলামিক উগ্ৰপন্থী সংগঠনৰ লোকে বসবাস কৰি আছে। তৃণমূলৰ জনপ্ৰতিনিধিয়ে এইসকল লোকক ভোটাৰ কাৰ্ড, আধাৰ কাৰ্ড, পেন কাৰ্ড বনাই দি আছে। মমতা বেনাৰ্জীয়ে সকলো জানে কিন্তু মমতা বেনাৰ্জীৰ আৰক্ষীয়ে গৃহ মন্ত্ৰালয়ৰ অধিসূচনাৰ পিছতো কোনো ব্যৱস্থা গ্ৰহণ কৰা নাই।
