অহা ২৩ জুলাইত দেশৰ বিত্ত মন্ত্ৰী নিৰ্মলা সীতাৰমণে লোকসভাত দাখিল কৰিব ২০২৪-২৫ বিত্তীয় বৰ্ষৰ বাবে পূৰ্ণাংগ বাজেট। ইয়াৰ বাবে তেওঁ ভাৰতীয় উদ্যোগখণ্ডৰ বিভিন্ন অৰ্থনীতিবিদ, বাণিজ্যিক অংশীদাৰসকলৰ সৈতে এক গুৰুত্বপূৰ্ণ আলোচনাত অংশগ্ৰহণ কৰে।
দেশৰ কৰদাতাসকলে দীৰ্ঘদিন ধৰি নতুন কৰ ব্যৱস্থাত পৰিবৰ্তনৰ দাবী কৰি আহিছে। এই ক্ষেত্ৰত বিত্ত মন্ত্ৰীগৰাকীয়ে ২০২৪-২৫ বিত্তীয় বৰ্ষৰ বাবে দাখিল কৰিবলগীয়া বাজেট ত নতুন কৰ ব্যৱস্থাৰ ক্ষেত্ৰত কেনেধৰণৰ পৰিবৰ্তন ঘটায় তাৰ বাবে অপেক্ষাত আছে দেশৰ প্ৰতিগৰাকী নাগৰিক।
উল্লেখ্য যে, ২০২০ চনৰ ১ ফেব্ৰুৱাৰিত বিত্ত মন্ত্ৰী নিৰ্মলা সীতাৰমণে ২০২০ বৰ্ষৰ বাজেট উত্থাপন কৰিছিল। য’ত নতুন কৰ ব্যৱস্থা প্ৰৱৰ্তনকে ধৰি গুৰুত্বপূৰ্ণ ঘোষণা কৰা হৈছিল। পুৰণি কৰ গাঁথনি সলনি কৰা আৰু কৰদাতাসকলৰ ওপৰত থকা কৰৰ বোজা হ্ৰাস কৰাৰ লক্ষ্যৰে নতুন কৰ ব্যৱস্থা প্ৰৱৰ্তন কৰা হৈছিল। যাৰ বাবে চৰকাৰে এই ব্যৱস্থাক পুৰণি কৰ ব্যৱস্থাতকৈ উন্নতমানৰ বুলি ঘোষণা কৰিছে। ইয়াক ৰেহাই কৰ ব্যৱস্থা বুলিও কোৱা হয়।
২০২৩-২৪ বিত্তীয় বৰ্ষৰ পৰা, চৰকাৰে নতুন কৰ ব্যৱস্থাক ডিফল্ট কৰি তুলিছে, অৰ্থাৎ যদিহে কোনো ব্যক্তিয়ে কোনো কৰ প্ৰণালী বাছনি নকৰে, তেন্তে তেওঁ স্বয়ংক্ৰিয়ভাৱে নতুন কৰ প্ৰণালীত অন্তৰ্ভুক্ত হ’ব।
অৱশ্যে বহুতো কৰ্মচাৰীয়ে এইচ আৰ এ ৰেহাই, ৮০ চি কৰ্তন আদি প্ৰাপ্ত কৰিবলৈ পুৰণি কৰ ব্যৱস্থা বাছনি কৰিছে। এই নতুন কৰ ব্যৱস্থাত, পুৰণি কৰ প্ৰণালীৰ অধীনত প্ৰদান কৰা সুবিধাবোৰৰ লাভালাভ উপলব্ধ নহয়।
বিগত কেইটামান বৰ্ষৰ পৰা, চৰকাৰে এন পি এছ আৰু নতুন ব্যক্তিগত কৰ ব্যৱস্থাৰ প্ৰসাৰ বৃদ্ধিৰ ওপৰত অধিক গুৰুত্ব প্ৰদান কৰি আহিছে। জানিবলৈ পোৱা মতে, চৰকাৰে এই বছৰৰ সাধাৰণ বাজেটতো এনেধৰণৰ বিষয়ৰ ওপৰত গুৰুত্ব আৰোপ কৰিব।
বৰ্তমান, ধাৰা ৮০ চিচিডি(১ বি)ৰ অধীনত ৫০,০০০ টকাৰ স্বেচ্ছামূলক অৱদানে পুৰণি ব্যৱস্থাৰ অধীনত অতিৰিক্ত কৰ কৰ্তনৰ সুবিধা লাভ কৰে। কিন্তু নতুন কৰ ব্যৱস্থাত এনে কোনোধৰণৰ সুবিধা নাই।
সূত্ৰ অনুসৰি, চৰকাৰে এই সাধাৰণ বাজেটত নতুন কৰ প্ৰণালীৰ অধীনত কৰ কৰ্তনৰ অনুমতি দিয়াৰ বিষয়ে বিবেচনা কৰিব। ই কৰদাতাসকলক অতিৰিক্ত কৰ কৰ্তনৰ সুবিধা প্ৰদান কৰিব। লগতে, অৱসৰৰ পৰিকল্পনাত অধিক বিনিয়োগত সহায় কৰিব। এইটোৱে নতুন কৰ প্ৰণালীক যথেষ্টখিনি উৎসাহিত কৰিব।
