অসমৰ পথ-যোগাযোগ আন্তঃগাঁথনি উন্নয়নৰ বাবে ডাঙৰ খবৰ। ৰাজ্যত অতি শীঘ্ৰে ৮০,০০০ কোটি টকাৰ পথ প্ৰকল্পৰ কাম আৰম্ভ হ’ব। বুধবাৰে এই কথা জানিবলৈ দিছে কেন্দ্ৰীয় পথ পৰিবহন মন্ত্ৰী নীতিন গাডকাৰীয়ে।
গুৱাহাটীত ২৫ ফেব্ৰুৱাৰীৰ পৰা দুদিনীয়াকৈ আৰম্ভ হোৱা এডভাণ্টেজ আছাম ২.০ৰ দ্বিতীয় দিনা ভাৰ্চুৱেলী অংশ লৈ কেন্দ্ৰীয় মন্ত্ৰী গাডকাৰীয়ে কয় যে মোৰ ১৫ বছৰীয়া কাৰ্যকালত অৰ্থাত ২০২৯ চনলৈ অসমত ৩ লাখ কোটি টকাৰ কাম সম্পূৰ্ণ হ’ব।
নতুনকৈ আৰম্ভ হ’বলগীয়া প্ৰকল্প সমূহৰ ভিতৰত প্ৰধানতঃ গুৱাহাটী ৰিং ৰোড, ব্ৰহ্মপুত্ৰ নদীৰ তলেৰে সুৰংগ পথ আৰু কাজিৰঙা ৰাষ্ট্ৰীয় উদ্যানত এলিভেটেড কৰিডৰ প্ৰকল্প অন্যতম বুলি উল্লেখ কৰে গাডকাৰীয়ে।
‘ইতিমধ্যে ৬০ হাজাৰ কোটি টকাৰ প্ৰকল্পৰ কাম ৰাজ্যখনত চলি আছে আৰু আন কেইবাটাও প্ৰকল্প সম্পূৰ্ণ হোৱাৰ পথত’, এই কথা জনাই পৰিবহন মন্ত্ৰী নীতিন গাডকাৰীয়ে।
উল্লেখ্য যে, ২৫ ফেব্ৰুৱাৰীৰ পৰা আৰম্ভ হোৱা এডভাণ্টেজ আছাম ২.০ৰ প্ৰথম দিনটোতে ৰিলায়েন্স ইণ্ডাষ্ট্ৰিজৰ অধ্যক্ষ মুকেশ আম্বানী আৰু আদানী গ্ৰুপৰ অধ্যক্ষ গৌতম আদানীয়ে অসমত ৫০ হাজাৰ-৫০ হাজাৰ কোটি টকা বিনিয়োগ কৰিব বুলি ঘোষণা কৰিছে।
ইয়াৰ উপৰি টাটা গ্ৰুপেও ৰাজ্যখনত বৃহত বিনিয়োগ কৰাৰ ঘোষণা কৰিছে। আনহাতে এডভাণ্টেজ আছাম ২.০ৰ দ্বিতীয় দিনটোত জি ভি আৰে ২০০০০ কোটি টকা বিনিয়োগ কৰিব বুলি প্ৰতিশ্ৰুতি প্ৰদান কৰিছে। এই বিনিয়োগৰ জৰিয়তে অসমত ৰামোজি ফিল্ম চিটিতকৈও উন্নতমানৰ ফিল্ম চিটি নিৰ্মাণ কৰা হ’ব।
