তিনি বছৰৰো অধিক সময় ধৰি চলি আছে ৰাছিয়া আৰু ইউক্ৰেইনৰ মাজত যুদ্ধ। এই যুদ্ধ অন্ত পৰাৰ পৰিৱৰ্তে শেহতীয়াকৈ অধিক তীব্ৰতৰ হোৱাহে পৰিলক্ষিত হৈছে। শেষ নোহোৱা এই যুদ্ধখনৰ পৰা এইবাৰ আহিছে এক ডাঙৰ খবৰ।
যুদ্ধৰ মাজতে ইউক্ৰেইনৰ ৰাষ্ট্ৰপতি জেলেনস্কিৰ এটা মন্তব্যই বিশ্বজুৰি তীব্ৰ চাঞ্চল্যৰ সৃষ্টি কৰিছে। ইউক্ৰেইনৰ বিৰুদ্ধে চলি থকা যুদ্ধত ৰাছিয়াৰ হৈ পাকিস্তানী সেনাই যুঁজ দিয়া বুলি ডাঙৰ দাবী কৰিছে জেলেনস্কিয়ে।
ইউক্ৰেইনৰ ৰাষ্ট্ৰপতিয়ে ছ’চিয়েল মিডিয়া প্লেটফৰ্ম এক্সযোগে উল্লেখ কৰিছে, ‘ৰাছিয়াৰ হৈ চীন, তাজিকিস্তান, উজবেকিস্তান, পাকিস্তান আৰু আফ্ৰিকান দেশৰ ভাড়াতীয়া সৈন্যই যুদ্ধত অংশগ্ৰহণ কৰা বুলি আমাৰ সেনাই উল্লেখ কৰিছে। আমি ইয়াৰ সঁহাৰি দিম।’
উল্লেখ্য যে, জেলেনস্কিয়ে কৰা এনেধৰণ দাবী এয়াই প্ৰথম নহয়। ইয়াৰ পূৰ্বে তেওঁ এটা ভিডিঅ’ শ্বেয়াৰ কৰিছিল য’ত ইউক্ৰেইনে ৰাছিয়াৰ হৈ যুঁজ দিয়া চীনৰ দুজন নাগৰিকক ধৰিছে বুলি দাবী কৰিছিল। জেলেনস্কিয়ে কৈছিল যে বন্দী চীনৰ নাগৰিকসকল তেওঁলোকৰ জিম্মাত আছে।
