আজিও জুবিন গাৰ্গৰ সমাধিক্ষেত্ৰত লোকাৰণ্য পৰিৱেশ। ২৩ ছেপ্তেম্বৰৰ পৰাই জাতি-ধৰ্ম-বৰ্ণ নিৰ্বিশেষে অসমৰ ভিন্নস্থানৰ প্ৰাণৰ শিল্পী জুবিন গাৰ্গলৈ একাঁজলি শ্ৰদ্ধাঞ্জলি আগবঢ়াবলৈ সকলো ওলাই আহিছে।
১০ অক্টোৱৰৰ নিশা হঠাৎ সোণাপুৰৰ জুবিন গাৰ্গৰ সমাধিক্ষেত্ৰত উপস্থিত হয় পত্নী গৰিমা শইকীয়া গাৰ্গ। ইয়াৰ পিছতে সমাধিক্ষেত্ৰত এক আৱেগিক পৰিৱেশ বিৰাজ কৰে। গৰিমা শইকীয়া গাৰ্গৰ সৈতে উপস্থিত সকলো জুবিন অনুৰাগীয়ে সমস্বৰে গায় ‘মায়াৱিনী ৰাতিৰ বুকুত’।
ইয়াৰ পিছতে সমাধিক্ষেত্ৰত স্বামীক স্মৰণ কৰি উচুপি উঠে পত্নী গৰিমা। অনুৰাগীৰ জুবিনলৈ অভূতপূৰ্ব মৰম দেখি আবেগিক হৈ পৰে গৰিমা গাৰ্গ।
ৰাইজৰ ওচৰত সেৱা প্ৰাৰ্থনাৰে জুবিন গাৰ্গৰ ন্যায়ৰ প্ৰসংগ উল্লেখ কৰে গৰিমাই। জুবিনৰ ন্যায়ৰ যুঁজত অংশীদাৰ হ’বলৈ আহ্বান জনালে গৰিমা শইকীয়া গাৰ্গে। জুবিনৰ পত্নী গৰিমাই কান্দি-কান্দি জুবিন গাৰ্গৰ বাবে বিচাৰিলে ন্যায়। কান্দি কান্দি গৰিমাই কলে, ‘২২টা দিন পাৰ হ’ল,আচলতে কি হৈছিল আমি একোৱেই নাজানো’। সকলো জুবিন অনুৰাগীকে সামাজিক মাধ্যমত #JusticeForZubeenGarg লিখিবলৈ আহ্বান জনালে গৰিমাই।
