জুবিন গাৰ্গৰ ন্যায়ৰ দাবীত আৰম্ভ হৈছে এক ডিজিটেল আন্দোলন। আৰক্ষী-প্ৰশাসনক ১০ দিনৰ সময় বান্ধি দিছে পত্নী গৰিমা শইকীয়া গাৰ্গ তথা জুবিনৰ ভগ্নী পামী বৰঠাকুৰে।
#we_Need_ZubeenGargJustice_within_10days, #JusticeForZubeenGarg আদি লিখি সামাজিক মাধ্যমত জুবিনৰ ন্যায়ৰ দাবী জনাইছে সকলো জুবিন অনুৰাগীয়ে।
জুবিন গাৰ্গৰ মৃত্যু গোচৰত চিআইডিৰ তদন্ত অব্যাহত আছে। আজি সাংবাদিক, সাহিত্যিক, সংগঠনৰ সৈতে CIDৰ বিশেষ তদন্তকাৰী গোটে এখন বৈঠকৰ আয়োজন কৰে।
বৈঠকৰ বাবে SIT-এ আমন্ত্ৰণ জনাইছে ৰাজ্যৰ কেইবাগৰাকী বিশিষ্ট ব্যক্তিক। অৱশ্যে আমন্ত্ৰিত ব্যক্তিসকলৰ অধিকাংশই অংশগ্ৰহণ নকৰে এই বৈঠকত। কিয়নো এই বৈঠক কি কাৰণে অনুষ্ঠিত কৰিব খুজিছে সেয়া এই মুহূৰ্তলৈকে জানিব পৰা হোৱা নাই।
বৈঠকৰ আমন্ত্ৰণ প্ৰত্যাখ্যান কৰিছে বিশিষ্ট সাংবাদিক মনোজ কুমাৰ গোস্বামী, জ্যেষ্ঠ সাংবাদিক ৰাজদ্বীপ বাইলুং বৰুৱা, ফণীন্দ্ৰ কুমাৰ দেৱচৌধুৰী, আছুৰ মুখ্য উপদেষ্টা ড০ সমুজ্জ্বল ভট্টাচাৰ্য, আছুৰ সভাপতি উৎপল শর্মা, বিশিষ্ট সাহিত্যিক অনুৰাধা শৰ্মা পূজাৰী, জুবিন গাৰ্গৰ পুত্ৰসম ৰাহুল গৌতম, জুবিন গাৰ্গৰ আত্মীয় শ্যামন্তক গৌতম,সমীৰণ ফুকনে।
আনহাতে এই বৈঠকত অংশগ্ৰহণ কৰিব- বিশিষ্ট চিকিৎসক হিতেশ বৰুৱা, শুভ্ৰ কিংকৰ গোস্বামী, জ্যেষ্ঠ সাংবাদিক ছৈয়দ জাৰিৰ হুছেইন, সাংবাদিক ৰামানুজ দত্ত চৌধুৰী, সাংবাদিক অতনু ভূঞা, জ্যেষ্ঠ সাংবাদিক সঞ্জীৱ ফুকন, সাংস্কৃতিক কৰ্মী শিৱাণু বৰা, বিশিষ্ট অভিনেতা প্ৰাঞ্জল শইকীয়াই।
