ৰাজ্যজুৰি অবৈধ অনুপ্ৰৱেশকাৰীৰ বিৰুদ্ধে প্ৰশাসনৰ বৃহৎ উচ্ছেদৰ মাজতে চামগুৰিৰ ভিন্ন অঞ্চলত এতিয়া বিৰাজ কৰিছে তীব্ৰ চাঞ্চল্য। কিয়নো চামগুৰিত পোহৰলৈ আহিছে এখনৰ পিছত আনখনকৈ চৰকাৰী ভূমিত সন্দেহজনক লোকৰ আগ্ৰাসনৰ দৃশ্য।
চামগুৰিৰ ৰাজহ চক্ৰৰ অন্তৰ্গত খাটোৱাল মৌজাৰ গেৰুৱামুখ চৰকাৰী ভূমি বেদখল কৰি আছিল একাংশ সন্দেহজনক লোকে। গেৰুৱামুখ চৰকাৰী গেজিং ৰিজাৰ্ভৰ প্ৰায় ২৯২বিঘা ভূমিত ১৫০ৰো অধিক পৰিয়ালৰ বেদখল কৰি আছিল।
বৰ্তমান সময়ত প্ৰায় ১৫০টা পৰিয়ালে সৰু-ডাঙৰ কেচাঁ ঘৰ, পকা ঘৰ বনাই সেই ঠাইত এখন গাঁও পাতিছে। বিভিন্ন অনুষ্ঠান-প্ৰতিষ্ঠানৰ লগতে তামোলৰ বাৰীও সাজিছে।
চৰকাৰী গেজিং ৰিজাৰ্ভত চামগুৰি মহাবিদ্যালয়ৰ নামত আৱন্তিত প্ৰায় ৪৬বিঘা ভূমিত বেদখল চলোৱাৰ অভিযোগ তুলিছে স্থানীয় ৰাইজে। এই ভূমিত বিদ্যুতৰ সংযোগৰ লগতে চৰকাৰী আৱাস গৃহও আছে। পূৰ্বতে এই চৰকাৰী ৰিজাৰ্ভ খনত থকা গছ-গছনি কাটি তহিলং কৰি ঘৰ সাজিছে এইসকল লোকে। যাৰ ফলত বৰ্তমান অস্তিত্বৰ সংকটত পৰিছে অসমৰ খিলঞ্জীয়া লোক।
সেয়েহ ৰাজ্যৰ বিভিন্ন প্ৰান্তৰ লগতে এই সমূহ চৰকাৰী ভূমিসমূহত চৰকাৰে উচ্ছেদ চলাই বেদখলমুক্ত কৰিবলৈ আহ্বান স্থানীয় খিলঞ্জীয়া ৰাইজে।
