ভাৰতৰ কাশ্মীৰক নিজৰ অংশ বুলি দাবী কৰি অহা পাকিস্তানে চম্ভালিব পৰা নাই নিজ দেশৰ সমস্যা। ভাৰতৰ সৈতে চলি থকা সংঘাতৰ মাজতে স্বাধীন ৰাষ্ট্ৰ বিচাৰি আন্দোলন তীব্ৰতৰ কৰি তুলিছে বেলুচিস্তানৰ সাধাৰণ নাগৰিকে।
পৃথক ৰাষ্ট্ৰৰ দাবীত পাকিস্তানৰ বিৰুদ্ধে চলি থকা আন্দোলনৰ মাজতে এইবাৰ এগৰাকী বেলুচ নেতাই দাবী কৰিছে যে এতিয়াৰে পৰা বেলুচিস্তান পাকিস্তানৰ অংশ নহয়। নেতাগৰাকীয়ে লগতে বিশ্বৰ আগশাৰীৰ দেশসমূহক বেলুচিস্তানক পৃথক ৰাষ্ট্ৰ কৰোৱাত সহায় কৰিবলৈও আহ্বান জনাইছে।
বেলুচ নেতা মীৰ য়াৰ বেলুচে এক্সযোগে প’ষ্ট কৰি কয় যে বেলুচিস্তানৰ সাধাৰণ জনতাই নিজৰ সিদ্ধান্ত লৈ লৈছে আৰু এতিয়া সমগ্ৰ বিশ্ব মনে মনে থাকিব নালাগে। ইয়াৰ উপৰি তেওঁ ভাৰতৰ লগতে বিশ্বৰ আন আন দেশসমূহক সহায় কৰিবলৈও আহ্বান জনায়।
বিদ্ৰোহী নেতাগৰাকীয়ে লগতে বেলুচ লোকসকলক এতিয়াৰ পৰা পাকিস্তানৰ নাগৰিক বুলি নক’বলৈ ভাৰতীয় সংবাদ মাধ্যম, ইউটিউবাৰ্ছ আৰু বুদ্ধিজীৱিসকলক কাতৰ আহ্বান জনায়।
মীৰ য়াৰ বেলুচে কয়, ‘পাকিস্তানক দিয়া আন্তঃৰাষ্ট্ৰীয় সাহায্য আৰু ঋণ আছিল ধনৰ অপচয়। ১৯৪৭ চনৰ পৰা ২০২৫ চনলৈকে পাকিস্তানে আই এম এফ, বিশ্ব বেংকৰ পৰা কোটি কোটি টকা লাভ কৰিছিল আৰু হাজাৰ হাজাৰ জেহাদী গোটক সমৰ্থন কৰিছিল। পাকিস্তানে সন্ত্ৰাসবাদৰ বিৰুদ্ধে যুদ্ধৰ নামত আমেৰিকাৰ পৰা ধন লৈছিল যদিও এই ধন সন্ত্ৰাসবাদীক দি ৫০০০তকৈ অধিক মাৰ্কিন সেনাক হত্যা কৰিছিল।’
মীৰ য়াৰ বেলুচে কয় যে পাকিস্তানে দখল কৰা বেলুচিস্তানত বেলুচ জনসাধাৰণ ৰাজপথত ওলাই আহিছে আৰু বেলুচিস্তান এতিয়া পাকিস্তানৰ অংশ নহয় বুলি তেওঁলোকৰ সিদ্ধান্ত। তেওঁ আৰু কয় যে এতিয়া আৰু এই বিষয়ত বিশ্বৰ আন আন দেশসমূহ মৌন দৰ্শক হৈ থাকিব নালাগে।
