২০২৫ বৰ্ষৰ আই পি এলৰ চেম্পিয়ন দল RCBৰ এগৰাকী বেগী বলাৰৰ বিৰুদ্ধে জঘন্য কাণ্ডৰ এক গুৰুতৰ অভিযোগ উত্থাপন হৈছে। জয়পুৰৰ এগৰাকী কিশোৰীয়ে সংগনেৰ সদৰ থানাত খেলুৱৈগৰাকীৰ বিৰুদ্ধে এফআইআৰ দাখিল কৰিছে।
কিশোৰীগৰাকীৰ অভিযোগমৰ্মে, খেলুৱৈজনে তেওঁক ক্ৰিকেটত কেৰিয়াৰ গঢ়ি তোলাৰ সপোন দেখুৱাইছিল, আৰু তাৰ পিছত দুবছৰ ধৰি অবিৰতভাৱে অপকৰ্ম সংঘটিত কৰি আহিছিল। অভিযোগ অতি গুৰুতৰ – কিয়নো যেতিয়া প্ৰথমে এই কাণ্ড সংঘটিত হৈছিল তেতিয়া কিশোৰীজনী নাবালিকা আছিল। এই গোচৰত আৰক্ষীয়ে POCSO আইনৰ অধীনত গোচৰ ৰুজু কৰিছে।
RCBৰ বেগী বলাৰ যশ দয়ালৰ বিৰুদ্ধে এই ভয়ংকৰ অভিযোগ উত্থাপন হৈছে। সংগনেৰ সদৰ থানাৰ এছ অ’ অনিল জয়মানে জানিবলৈ দিয়া মতে, ভুক্তভোগীৰ বয়স সন্দৰ্ভত তথ্যচিত্ৰ পৰীক্ষণৰ কাম চলি আছে যদিও প্ৰাৰম্ভিক তদন্তৰ ভিত্তিত POCSO আইন আৰু ধাৰা ৩৭৬ৰ অধীনত গোচৰ ৰুজু কৰা হৈছে।আৰক্ষীয়ে ভুক্তভোগীৰ চিকিৎসা পৰীক্ষা কৰাইছে আৰু ম’বাইল চেট, কল ৰেকৰ্ডিং, হোটেলৰ চিচিটিভি ফুটেজ আদি গুৰুত্বপূৰ্ণ তথ্য সংগ্ৰহ কৰি আছে।
আটাইতকৈ চাঞ্চল্যকৰ কথাটো হ’ল এমাহৰ ভিতৰত যশৰ বিৰুদ্ধে ৰুজু হোৱা এইটোৱেই দ্বিতীয়টো অপকৰ্মৰ গোচৰ। ইয়াৰ পূৰ্বে ৮ জুলাইত গাজিয়াবাদৰ এগৰাকী যুৱতীয়ে যশৰ বিৰুদ্ধে বিয়াৰ প্ৰলোভন দি জঘন্য কাণ্ড সংঘটিত কৰাৰ অভিযোগ উত্থাপন কৰিছিল।
দুয়োটা গোচৰতে – গাজিয়াবাদ আৰু জয়পুৰত উত্থাপিত অভিযোগ অতি গুৰুতৰ। এফালে নাবালকৰ POCSO, আনফালে বিবাহৰ মিছা প্ৰতিশ্ৰুতি আৰু নিৰন্তৰ শাৰীৰিক শোষণ। বৰ্তমান আৰক্ষীয়ে এই ঘটনা সন্দৰ্ভত তদন্ত আৰম্ভ কৰিছে। পৰৱৰ্তী সময়ত প্ৰকৃত সত্য পোহৰলৈ আহিব।
