ইজৰাইলে পুনৰবাৰ আক্ৰমণ কৰিব পাৰে ইৰাণক। বাতৰি অনুসৰি, ইৰাণৰ বেলিষ্টিক মিছাইল কাৰ্যসূচীত ক্ষুব্ধ ইজৰাইলে পুনৰ আক্ৰমণৰ পৰিকল্পনা কৰিছে। ইজৰাইলৰ প্ৰধানমন্ত্ৰী বেঞ্জামিন নেতান্যায়াহুৱে ২৯ ডিচেম্বৰত আমেৰিকাত ৰাষ্ট্ৰপতি ড’নাল্ড ট্ৰাম্পৰ সৈতে সাক্ষাৎ কৰাৰ সম্ভাৱনা। এই বৈঠকৰ সময়ত তেওঁ ট্ৰাম্পক ভৱিষ্যতৰ পৰিকল্পনাৰ বিষয়ে অৱগত কৰিব পাৰে।
ইৰাণৰ বিষয়াসকলে কয় যে, ক্ষেপণাস্ত্ৰ কাৰ্যসূচীৰ বাবে ড’নাল্ড ট্ৰাম্পেও ইৰাণক আক্ৰমণ কৰিব বিচাৰে। বিষয়াগৰাকীয়ে কয় যে, ইজৰাইলে ইয়াৰ পূৰ্বে আমেৰিকাৰ বিষয়াসকলৰ সৈতে এই বিষয়ে আলোচনা কৰিছে। শেহতীয়াকৈ ইজৰাইল আৰু ইৰানে যুদ্ধত লিপ্ত হৈছিল, তাৰ পিছত আমেৰিকাই ইৰাণৰ পাৰমাণৱিক স্থানত বোমা বিস্ফোৰণ কৰিছিল।
বাতৰি অনুসৰি, ইৰাণে পাৰমাণৱিক সুবিধাসমূহ পুনৰ নিৰ্মাণ কৰিছে, যাৰ বাবে উদ্বেগৰ সন্মুখীন হৈছে ইজৰাইল। ইৰাণেও বেলিষ্টিক মিছাইল নিৰ্মাণ কৰি আছে, যিটো ইজৰাইলৰ বাবে এক ডাঙৰ চিন্তাৰ বিষয়। সূত্ৰসমূহে জনোৱা মতে, বেঞ্জামিন নেতান্যায়াহুৱে ড’নাল্ড ট্ৰাম্পক সুধিব পাৰে যে ইৰাণৰ বিৰুদ্ধে অভিযানত আমেৰিকাই কেনেধৰণৰ সহায় আগবঢ়াব।
আন্তঃৰাষ্ট্ৰীয় পাৰমাণৱিক শক্তি সংস্থাৰ সঞ্চালক প্ৰধান ৰাফেল গ্ৰ’ছিয়ে কয় যে সংস্থাটোৱে ইৰাণৰ আটাইতকৈ স্পৰ্শকাতৰ পাৰমাণৱিক স্থানত প্ৰৱেশ কৰিবলৈ সক্ষম হোৱা নাই। ইফালে ইৰাণে “নিজৰ পাৰমাণৱিক উদ্যোগ আৰু বিজ্ঞানীসকলৰ সুৰক্ষা”ক লৈ উদ্বেগ প্ৰকাশ কৰাৰ বাবে আই এ ই এক বিশ্বাস কৰিব নোৱাৰে বুলি উল্লেখ কৰিছে।
মন কৰিবলগীয়া যে, ২০২৫ চনৰ জুন মাহত ইজৰাইল আৰু ইৰাণৰ মাজত উত্তেজনা বৃদ্ধি পাইছিল, আৰু দুয়োখন দেশে ইজনে সিজনৰ বিৰুদ্ধে বিমান আক্ৰমণ চলাইছিল। ইজৰাইলে ইৰাণক গোপন পাৰমাণৱিক কাৰ্যসূচী চলোৱাৰ অভিযোগ উত্থাপন কৰিছিল, যিটো দাবী ইৰাণে তীব্ৰভাৱে অস্বীকাৰ কৰিছে। এই দাবী ব্যৱহাৰ কৰি ইজৰাইলে ১৩ জুনত ইৰাণৰ পাৰমাণৱিক আৰু সামৰিক সুবিধাসমূহ আক্ৰমণ কৰিছিল। ৯ দিনৰ পাছত ২২ জুনত আমেৰিকাই নাটাঞ্জ, ইছফাহান, ফৰ্ডোত থকা ইৰাণৰ পাৰমাণৱিক কেন্দ্ৰসমূহতো বিমান আক্ৰমণ চলায়।
