২৭ বছৰৰ অন্তত দিল্লীত বিজেপি পুনৰ ক্ষমতালৈ আহিছে। গতিকে দিল্লীৰ নতুন মুখ্যমন্ত্ৰী সন্দৰ্ভত বিজেপিৰ কেন্দ্ৰীয় নেতৃত্বই লৈছে এক মাষ্টাৰষ্ট্ৰ’ক।
১৯৯৮ত শেষবাৰৰ বাবে দিল্লীত বিজেপিৰ ক্ষমতা আছিল, তেতিয়া মুখ্যমন্ত্ৰী আছিল বিজেপিৰ সুষমা স্বৰাজ। কিন্তু সুষমা স্বৰাজৰ পিছত দিল্লীৰ ক্ষমতা যায় কংগ্ৰেছলৈ।
এতিয়া ২০২৫ চনত ক্ষমতালৈ আহি বিজেপিয়ে এক নতুন কৌশল লৈছে। সেয়া হৈছে ৰেখা গুপ্তাক মুখ্যমন্ত্ৰীৰ আসনত অধিস্থিত কৰা।
অৱশ্যে ৰেখা গুপ্তাৰ নাম ঘোষণাৰ পূৰ্বে বুধবাৰে সন্ধিয়ালৈকে দলৰ শীৰ্ষ নেতা-পৰ্যবেক্ষকৰ দীঘলীয়া ৰাউণ্ডৰ বৈঠক অনুষ্ঠিত হয়। তাৰপিছত দীৰ্ঘদিনীয়া উৎসুকতাৰ অন্তত অৱশেষত ৰেখা গুপ্তাক বিজেপি বিধানসভাৰ নেত্ৰী নিৰ্বাচিত কৰা হয়। ইয়াৰ পিছতেই দিল্লীত মুখ্যমন্ত্ৰীৰ নাম ঘোষণা কৰা হয়।
নাম ঘোষণাৰ পিছতেই ৰেখা গুপ্তাক অভিনন্দন জনোৱাৰ প্ৰক্ৰিয়া আৰম্ভ হয়। কেন্দ্ৰীয় গৃহমন্ত্ৰী অমিত শ্বাহ, প্ৰতিৰক্ষা মন্ত্ৰী ৰাজনাথ সিং, দিল্লীৰ প্ৰাক্তন মুখ্যমন্ত্ৰী আতিশীকে আদি কৰি অৰবিন্দ কেজৰিৱালেও ৰেখা গুপ্তাক অভিনন্দন জনায়। লগতে অৰবিন্দ কেজৰিৱালে দিল্লী চৰকাৰক উন্নয়নমূলক কামত গঠনমূলক সহায় আগবঢ়োৱাৰ প্ৰতিশ্ৰুতি দিয়ে।
ইফালে ৰেখা গুপ্তাই জানিবলৈ দিয়ে যে দিল্লীৰ উন্নয়নৰ দায়িত্ব পালন কৰিবলৈ তেওঁ সম্পূৰ্ণৰূপে সাজু। এয়া আছিল শপতগ্ৰহণৰ পূৰ্বে ৰেখা গুপ্তাৰ দিল্লীলৈ দিয়া প্ৰথম প্ৰতিশ্ৰুতি।
ৰেখা গুপ্তা প্ৰথমবাৰৰ বাবে সংখ্যালঘু সমষ্টি শালীমাৰ বাগৰ পৰা বিধায়িকা নিৰ্বাচিত হৈছিল। তেওঁ আম আদমি পাৰ্টিৰ নেত্ৰী বন্দনা কুমাৰীক পৰাস্ত কৰিছিল। দিল্লী বিশ্ববিদ্যালয়ৰ ছাত্ৰ ৰাজনীতিৰ সক্ৰিয় অংশ হিচাপে কাম কৰি আহিছে তেখেতে। এবিভিপিৰ সম্পাদিকা হিচাপে কাম কৰি আহিছে।
দিল্লীৰ ৰাজনীতিত বিজয় বা পৰাজয়ৰ বাবে দলিত আৰু মুছলমান বিষয়বোৰো মহিলাৰ সমস্যাৰ দৰেই গুৰুত্বপূৰ্ণ হৈ আহিছে। আৰম্ভণিৰে পৰাই আম আদমী পাৰ্টিয়ে বিনামূলীয়া বাছ যাত্ৰা, মহল্লা ক্লিনিকৰ দৰে আঁচনিৰে দিল্লীৰ মহিলা ভোট বেংকক আকৰ্ষণ কৰিবলৈ চেষ্টা কৰি আহিছে।
নিৰ্বাচন আয়োগৰ তথ্য অনুসৰি মুঠ ৬০.৯২ শতাংশ মহিলাই ভোটদান কৰাৰ বিপৰীতে ৬০.২০ শতাংশ পুৰুষে ভোটদান কৰে। যিহেতু মহিলাসকলে বৃহৎ সংখ্যক ভোটদানত অংশ লৈছিল, সেয়েহে মহিলা মুখ্যমন্ত্ৰীৰ সিদ্ধান্তক মহিলাৰ সপক্ষে নতুন উপহাৰ বুলি ক’ব পাৰি।
এইদৰে ৰেখা গুপ্তাক মুখ্যমন্ত্ৰী কৰি বিজেপিয়ে কেৱল দিল্লীকে নহয় বিহাৰ আৰু পশ্চিমবংগকো লক্ষ্য কৰি লৈছে।
ইফালে আজি শপতগ্ৰহণৰ বাবে দিল্লীৰ ৰামলীলা ময়দান আটকধুনীয়াকৈ সজাই পৰাই তোলা হৈছে। লগতে নিৰাপত্তা ব্যৱস্থাও কটকটীয়া কৰি তোলা হৈছে। পুৱা ১০ বজাত অনুষ্ঠিত হ’বলগীয়া এই শপতগ্ৰহণ অনুষ্ঠানৰ বাবে দিল্লীত একত্ৰিত হৈছে বিজেপিৰ সকলো শীৰ্ষ নেতৃত্ব।
