আজি চেম্পিয়নছ ট্ৰফীৰ এখন গুৰুত্বপূৰ্ণ মেচত সমুখ সমৰত নামিব ভাৰত-পাকিস্তান। ডুবাইত অনুষ্ঠিত হ’বলগীয়া এই হাইভল্টেজ মেচখন দুয়োখন দেশৰ বাবে হ’ব অত্যন্ত গুৰুত্বপূৰ্ণ। মেচখনত জয়ী হোৱা মানেই ছেমি ফাইনেলত স্থান নিশ্চিত হ’ব ভাৰতৰ। আনহাতে পৰাজয়ে প্ৰতিযোগিতাখনৰ পৰা বাহিৰ হোৱাৰ উপক্ৰম ঘটাব পাকিস্তানৰ।
এই মেচখনত যাতে পাকিস্তানৰ বিৰুদ্ধে ভাৰত জয়ী হয় তাৰ বাবে ইতিমধ্যে দেশৰ প্ৰান্তে প্ৰান্তে অনুৰাগীসকলক পূজা-অৰ্চনা কৰা দেখা গৈছে। প্ৰায়েই এইধৰণৰ মহাৰণৰ পূৰ্বে ভাৰতৰ ক্ৰিকেট অনুৰাগীসকলে ভাৰতৰ জয়ৰ বাবে পূজা-অৰ্চনা কৰা দেখা যায়।
মেচখনৰ পূৰ্বে উত্তৰ প্ৰদেশৰ বাৰাণসীত অনুৰাগীয়ে পূজা-অৰ্চনা কৰে। পোহৰলৈ আহিছে ইয়াৰ ভিডিঅ’। শিশুসকলেও টিম ইণ্ডিয়াৰ জয়ৰ বাবে প্ৰাৰ্থনা কৰা দেখা গৈছে।
আই চি চি এদিনীয়া টুৰ্ণামেণ্টত পাকিস্তানৰ বিৰুদ্ধে ভাৰতৰ অভিলেখ যথেষ্ট উন্নত। এই পৰ্যন্ত ভাৰতে এদিনীয়া টুৰ্মামেণ্টত পাকিস্তানৰ বিৰুদ্ধে মুঠ ১৩খন খেল খেলিছে। এই সময়ছোৱাত টিম ইণ্ডিয়াই ১০খন খেলত জয়লাভ কৰিছে। চেম্পিয়নছ ট্ৰফীতো ভাল প্ৰদৰ্শন আগবঢ়াইছে টিম ইণ্ডিয়াই।
দৃষ্টি নিৱদ্ধ থাকিব ভাৰত-পাকিস্তানৰ এই খেলুৱৈসকলৰ ওপৰত
সকলোৰে দৃষ্টি থাকিব টিম ইণ্ডিয়াৰ তাৰকা খেলুৱৈ বিৰাট কোহলী আৰু ৰোহিত শৰ্মাৰ ওপৰত। দীৰ্ঘদিন ধৰি কোহলীৰ বেটেৰে অহা নাই পৰ্যাপ্ত ৰান। অনুৰাগীসকলে কোহলীৰ পৰা আজি ভাল প্ৰদৰ্শন আশা কৰিছে। আনহাতে বাবৰ আজম আৰু মহম্মদ ৰিজৱানৰ পৰাও পাকিস্তানী অনুৰাগীসকলে ভাল প্ৰদৰ্শনৰ আশা কৰিছে।
