পবিত্ৰ ৰমজান মাহৰ পূৰ্বে শুকুৰবাৰে (২৮ ফেব্ৰুৱাৰী, ২০২৫) উত্তৰ-পশ্চিম পাকিস্তানৰ খাইবাৰ পাখতুনখোৱা প্ৰদেশৰ তালিবান সমৰ্থক মছজিদত এক ভয়ংকৰ বিস্ফোৰণ সংঘটিত হয়। জামিয়া হাক্কানিয়া মাদ্ৰাছাত সংঘটিত বোমা বিস্ফোৰণত ৫ জন লোক নিহত হোৱাৰ লগতে কেইবাজনো আহত হোৱাৰ খবৰ আহিছে।
সংবাদ সংস্থা এছ’চিয়েটেড প্ৰেছৰ প্ৰতিবেদন অনুসৰি জিলা আৰক্ষী অধীক্ষক আব্দুল ৰছিদে কয় যে এই বিস্ফোৰণটো খাইবাৰ পাখতুনখোৱা প্ৰদেশৰ আককোৰা খট্টক জিলাত সংঘটিত হৈছে। এই সন্দৰ্ভত বিষয়াসকলে তদন্ত কৰি আহতসকলক চিকিৎসালয়লৈ লৈ যোৱা বুলি জানিবলৈ দিয়ে। এতিয়ালৈকে কোনো সংগঠনে এই আক্ৰমণৰ দায়িত্ব লোৱা নাই।
মাদ্ৰাছাৰ মূল প্ৰেক্ষাগৃহত শুকুৰবাৰৰ নামাজৰ সময়ত সংঘটিত হয় এই বিস্ফোৰণ। আ এটা আগশাৰীৰ সংবাদ মাধ্যমৰ প্ৰতিবেদন অনুসৰি কৰ্তৃপক্ষই অঞ্চলটো জৰুৰীকালীন বুলি ঘোষণা কৰিছে।
বিস্ফোৰণ সংঘটিত হোৱা জামিয়া হাক্কানিয়া মাদ্ৰাছা কেম্পাছত প্ৰায় ৪ হাজাৰ ছাত্ৰ-ছাত্ৰীক বিনামূলীয়া খাদ্য আৰু শিক্ষাৰ ব্যৱস্থা কৰা হয়। এটা পাকিস্তানী টিভিৰ প্ৰতিবেদন অনুসৰি প্ৰাৰম্ভিক তদন্ত অনুসৰি এয়া আত্মঘাতী বিস্ফোৰণ যেন লাগে। এজন শীৰ্ষ বিষয়াই কয় যে এই বিস্ফোৰণৰ জৰিয়তে মৌলানা হামিদুল হক হাক্কানীক লক্ষ্য কৰি লোৱা হৈছিল।
পাকিস্তান চৰকাৰৰ মন্ত্ৰী মহছিন নাকভিয়ে ছ’চিয়েল মিডিয়া এক্সযোগে এই ঘটনাক গৰিহণা দিয়ে। তেওঁ কয়, ‘শত্ৰু দেশখনে পাকিস্তানত অস্থিৰতা সৃষ্টিৰ ষড়যন্ত্ৰ কৰিছে। আমি শত্ৰুৰ প্ৰতিটো ষড়যন্ত্ৰ বিফল কৰিম। আমি মৃতকৰ পৰিয়ালৰ সৈতে আছো।‘
তেওঁ লগতে মৌলানা হামিদুল হক হাক্কানী আৰু অন্যান্য আহতসকলৰ আশু আৰোগ্যৰ বাবে প্ৰাৰ্থনা জনায়।
ইফালে খাইবাৰ পাখতুনখোৱা প্ৰদেশত সংঘটিত বোমা বিস্ফোৰণ সন্দৰ্ভত পাকিস্তানৰ প্ৰধানমন্ত্ৰী শ্বাহবাজ শ্বৰীফে কয় যে এনে কাপুৰুষালিয়ে সন্ত্ৰাসবাদৰ বিৰুদ্ধে আমাৰ সংকল্প দুৰ্বল কৰিব নোৱাৰে। তেওঁ কয় যে আমি দেশৰ পৰা সকলো ধৰণৰ সন্ত্ৰাসবাদ সম্পূৰ্ণৰূপে নিৰ্মূল কৰিবলৈ প্ৰতিশ্ৰুতিবদ্ধ।
