টি-২০ বিশ্বকাপ জয়ী ভাৰতীয় দলটোৱে আজি নতুন দিল্লীত প্ৰধান মন্ত্ৰী নৰেন্দ্ৰ মোদীক সাক্ষাত কৰে। প্ৰধান মন্ত্ৰীয়ে খেলুৱৈসকলক সাক্ষাত কৰাৰ সেই দৃশ্য তথা ফটো সম্প্ৰতি ছ’চিয়েল মিডিয়াত ভাইৰেল হৈ পৰিছে।
প্ৰধান মন্ত্ৰী আৱাসত সাক্ষাতৰ সময়ত প্ৰধান মন্ত্ৰী মোদীয়ে প্ৰতিগৰাকী খেলুৱৈৰ সৈতে কথা-বতৰা পতাৰ লগতে কিছু হাঁহি ধেমালি কৰাও পৰিলক্ষিত হয়। ইয়াৰ উপৰি প্ৰায় প্ৰতিগৰাকী খেলুৱৈৰ সৈতে ফটোও উঠা দেখা যায় প্ৰধান মন্ত্ৰী মোদীক।
কিন্তু ট্ৰফীৰ সৈতে যেতিয়া গ্ৰুপ ফটোৰ বাবে প’জ দিছিল তেতিয়া প্ৰধানমন্ত্ৰীয়ে স্পৰ্শ কৰা নাছিল ট্ৰফীটো। তেওঁ অধিনায়ক ৰোহিত শৰ্মা আৰু প্ৰশিক্ষক ৰাহুল দ্ৰাবিড়ৰ হাতত ধৰিহে ফটো উঠিছিল। প্ৰধান মন্ত্ৰীয়ে ট্ৰফীটো স্পৰ্শ নকৰাকৈ উঠা ফটোখন এতিয়া ছ’চিয়েল মিডিয়াত চৰ্চাৰ কেন্দ্ৰ বিন্দু হৈ পৰিছে।
প্ৰধান মন্ত্ৰীয়ে কিয় স্পৰ্শ কৰা নাছিল ট্ৰফীটো…..
জানিব পৰা অনুসৰি, কিছু নিৰ্বাচিত লোকেহে খালী হাতেৰে ট্ৰফী স্পৰ্শ কৰাৰ অনুমতি থাকে, য’ত প্ৰতিযোগিতাত জয়ী হোৱা খেলুৱৈ, মেনেজাৰৰ লগতে আন কিছু বিষয়া। ফিফা বিশ্বকাপ ট্ৰফীৰ বাবে এয়াই নিয়ম। সেই কথা লক্ষ্য ৰাখিয়েই প্ৰধান মন্ত্ৰী মোদীয়ে হয়তো টি-২০ বিশ্বকপৰ ট্ৰফীটো খালী হাতেৰে স্পৰ্শ নকৰিলে।
উল্লেখ্য যে, বাৰ্বাডোজৰ পৰা আজি ৰাতিপুৱা দিল্লীত উপস্থিত হোৱাৰ পিছতেই বিশ্বকাপ জয়ী ভাৰতীয় দলটোৱে দুপৰীয়া প্ৰধান মন্ত্ৰী মোদীক সাক্ষাত কৰিছিল। প্ৰধানমন্ত্ৰী মোদীক সাক্ষাত কৰাৰ পিছতেই দলটোৱে ৰাওনা হয় মুম্বাইলৈ।
মুম্বাইত খেলুৱৈসকলে মুকলি বাছেৰে বিজয় পেৰেডত অংশ লোৱাৰ পিছত সন্ধিয়া ৱাংখেড়ে ষ্টেডিয়ামত বি চি চি আইয়ে আয়োজন কৰা সম্বৰ্ধনা অনুষ্ঠানত অংশ ল’ব।
