সুপ্ৰভাত। দিনটোৰ আৰম্ভণিতেই কেইটামান গুৰুত্বপূৰ্ণ খবৰেৰে আৰম্ভ কৰিছো ৰাতিপুৱাৰ এই শিতানটো।
হঠাৎ অন্ধকাৰৰ হৈ পৰিছে আকাশ। কেইবাখনো জিলাত বতৰে লৈছে কালৰূপ। ধুবুৰী, কোকৰাঝাৰ জিলাৰ বিভিন্ন প্ৰান্তত, মঙলদৈ আৰু ইয়াৰ দাঁতিকাষৰীয়া অঞ্চলতো প্ৰচণ্ড শিলাবৃষ্টি হোৱা দেখা গৈছে। ধুমুহাত গছ ভাঙি উভালি পৰাত ব্যাহত বিদ্যুৎ সেৱা। অহা ২৮ এপ্ৰিললৈ ধাৰাসাৰ বৰষুণৰ সতৰ্কবাণী বতৰ বিজ্ঞান কেন্দ্ৰৰ। কেইবাখনো জিলাত অৰেঞ্জ আৰু হালধীয়া এলাৰ্ট জাৰি কৰা হৈছে।
বিহু নাচিবলৈ গৈ প্ৰাণ হেৰুৱালে এগৰাকী নাচনীয়ে। নিশা তামুলপুৰত এক ভয়ংকৰ পথ দুৰ্ঘটনা সংঘটিত হয়। দুৰ্ঘটনাগ্ৰস্ত হয় নলবাৰীৰ হাৰিভাঙাৰ ভাস্কৰজ্যোতি বিহু হুঁচৰি দল। এই দুৰ্ঘটনাত নিশামণি হালৈ নামৰ এগৰাকী নাচনীৰ থিতাতে মৃত্যু। লগতে ১১ গৰাকী বিহুৱা-বিহুৱতী গুৰুতৰভাৱে আহত হয়। বিপৰীত দিশৰ পৰা অহা দ্ৰুতবেগী ট্ৰেভেলাৰৰ সৈতে মুখামুখি সংঘৰ্ষ হয় এই বাহনখনৰ। তামুলপুৰ-নাগ্ৰীজুলি পথৰ নোৱাখাটত এই ভয়ংকৰ দুৰ্ঘটনা সংঘটিত হয়।
শ্ৰী ৰাম জন্মভূমি ট্ৰাষ্টে অযোধ্যাত ৰাম লালাৰ দৰ্শনৰ বাবে ভক্তক পাছ প্ৰদান কৰে। শ্ৰী ৰাম জন্মভূমি ট্ৰাষ্টৰ ৱেবছাইটত পাছ দিব পাৰিব যাতে ভক্তসকলে ভিৰ পৰিহাৰ কৰি সহজে মন্দিৰলৈ যাব পাৰে। এই ধৰণৰ ব্যৱস্থা সাধাৰণতে মহিলা আৰু বৃদ্ধসকলৰ বাবে উপযোগী। খবৰ অনুসৰি শ্ৰী ৰাম জন্মভূমি ট্ৰাষ্টে ৱেবছাইটৰ পৰা ৰাম লালাৰ বিশেষ দৰ্শনৰ বিকল্প আঁতৰাই পেলাইছে। ব্যৱস্থাটোত আন কেইবাটাও সালসলনিও কৰা হৈছে। এতিয়া সুগম দৰ্শনৰ লগতে সাধাৰণ দৰ্শনৰ বিকল্পও ৱেবছাইটত উপলব্ধ হ’ব।
বিবাহ অনুষ্ঠানৰ পৰা ঘৰলৈ উভতি অহাৰ সময়ত এখন ট্ৰাকৰ সৈতে চাৰিচকীয়া সৰু বাহন এখনে খুন্দা মৰাৰ ফলত ৫ জন লোক নিহত হোৱাৰ লগতে গুৰুতৰভাৱে আহত হয় ৪ জন। মহাৰাষ্ট্ৰৰ ভাণ্ডাৰা জিলাত সংঘটিত হৈছে এই দুৰ্ঘটনা। নিহতসকলৰ ভিতৰত আছে দৰাৰ ককাক আৰু পেহীয়েক। আৰক্ষীৰ মতে, পাৱনী তহচিলৰ আদয়াল গাঁৱৰ সমীপত সংঘটিত হৈছে এই দুৰ্ঘটনা। তীব্ৰ বেগেৰে গৈ থকা গাড়ীখনৰ হঠাৎ টায়াৰ ফাটি যোৱাৰ ফলত চালকজনে নিয়ন্ত্ৰণ হেৰুৱাই ট্ৰাকৰ সৈতে খুন্দা মাৰে।
ইৰাণত যুদ্ধৰ ক্ৰমবৰ্ধমান ভাবুকিৰ মাজতে চীনে নিজৰ নাগৰিকসকলৰ বাবে এক বৃহৎ পৰামৰ্শ জাৰি কৰিছে। চীনে নিজৰ নাগৰিকসকলক অতি সোনকালে ইৰাণ এৰি যাবলৈ বা নিৰাপদ অঞ্চললৈ যাবলৈ আহ্বান জনাইছে। ভাৰতে প্ৰায় ২৪ ঘন্টা পূৰ্বে নিজৰ নাগৰিকক একেধৰণৰ সতৰ্কবাণী জাৰি কৰিছিল। চীনৰ বৈদেশিক মন্ত্ৰালয়ে উল্লেখ কৰিছে যে বৰ্তমানৰ পৰিস্থিতিৰ প্ৰতি লক্ষ্য ৰাখি ইৰাণত গুৰুতৰ নিৰাপত্তাজনিত ভাবুকি অব্যাহত আছে। মন্ত্ৰালয়ৰ মতে, আকাশমাৰ্গ আংশিকভাৱে মুকলি কৰা হৈছে যদিও পৰিস্থিতি জটিল আৰু অস্থিৰ হৈয়ে আছে।
