পান মছলা ব্ৰেণ্ড ‘বিমল’ৰ বিজ্ঞাপনক লৈ অভিনেতা অজয় দেৱগন, টাইগাৰ শ্ৰফৰ লগতে হিন্দী চলচ্চিত্ৰ জগতৰ ছুপাৰষ্টাৰ শ্বাহৰুখ খানলৈ জাননী জাৰি কৰা হৈছে। এই আদেশ জয়পুৰস্থিত জিলা গ্ৰাহক বিবাদ নিষ্পত্তিকৰণ ফ’ৰামে জাৰি কৰিছে।
যোগেন্দ্ৰ সিং নামৰ এজন ব্যক্তিৰ অভিযোগৰ ভিত্তিত ফ’ৰামৰ অধ্যক্ষ গ্যাৰচিলাল মীনা আৰু সদস্য হেমলতা আগৰৱালে বলীউদৰ অভিনেতা কেইজনক জাননী জাৰি কৰিবলৈ কৈছে।
পান মছলাৰ এই বিজ্ঞাপন বিভ্ৰান্তিকৰ বুলি অভিযোগ উত্থাপন হৈছে। বিমল পান মছলাৰ বিজ্ঞাপনটোত দাবী কৰা হৈছে তাত কেশৰ আছে। অভিনেতা কেইজনে বিমল পান মছলাত কেশৰ থকাৰ দাবী কৰি ভুৱা অপপ্ৰচাৰ চলোৱাৰ অভিযোগ উত্থাপন কৰি বিজ্ঞাপনটোত নিষেধাজ্ঞা আৰোপ কৰাৰ দাবী উত্থাপন কৰিছে যোগেন্দ্ৰ সিঙে।
‘বোলো জুবান কেশৰী’ টেগ লাইনৰ এই বিজ্ঞাপনটোৱে পান মছলাৰ পেকেটত কেশৰ থকা বুলি দাবী কৰি বাতৰিৰ শিৰোনাম দখল কৰিছে। বিজ্ঞাপনটোত দেখা যায় যে অভিনেতাসকলে যেতিয়াই পান মছলাৰ পেকেটটো খোলে তেতিয়া তাৰ পৰা কেশৰ ওলাব আৰম্ভ কৰে।
এই বিজ্ঞাপনত শ্বাহৰুখ খান আৰু অজয় দেৱগনৰ উপৰি টাইগাৰ শ্ৰফকো দেখা যায়। ইয়াৰ পূৰ্বে অক্ষয় কুমাৰকো শ্বাহৰুখ খান আৰু অজয় দেৱগনৰ সৈতে দেখা গৈছিল যদিও বিতৰ্কৰ পিছত অক্ষয় কুমাৰে ইয়াৰ পৰা আঁতৰি আহে।
উল্লেখ্য যে, বিমলৰ ব্ৰেণ্ড এম্বেছদৰ আছিল অক্ষয় কুমাৰ। কিন্তু এই বিজ্ঞাপনক লৈ ছ’চিয়েল মিডিয়াত হোৱা সমালোচনাৰ পিছতেই তেওঁ ইয়াৰ পৰা আঁতৰি অহাৰ সিদ্ধান্ত লৈছিল। তেওঁ কৈছিল যে মই কোনো ধৰণৰ ধপাত জাতীয় সামগ্ৰীক সমৰ্থন নকৰো।
