ৰাছিয়া-ইউক্ৰেইন যুদ্ধক লৈ ছৌদি আৰৱৰ জেদ্দাত পুনৰ বৈঠকত মিলিত হ’ব আমেৰিকা আৰু ৰাছিয়াৰ বিষয়া। দ্বিতীয় ৰাউণ্ডৰ শান্তি আলোচনাৰ পূৰ্বে সোমবাৰে ছৌদি আৰবলৈ ৰাওনা হ’ল ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কি। তাত তেওঁ ক্ৰাউন প্ৰিন্স মহম্মদ বিন ছলমানক লগ কৰিব।
ইয়াৰ পূৰ্বে জেলেনস্কিৰ আমেৰিকা ভ্ৰমণৰ সময়ত ৰাষ্ট্ৰপতি ট্ৰাম্পৰ সৈতে তেওঁৰ তৰ্কা-তৰ্কি হৈছিল। অৱশ্যে এতিয়া জেলেনস্কিয়ে কয় যে, তেওঁ আমেৰিকাৰ পৰা ইতিবাচক সংকেত পাইছে।
ইফালে, ২০২২ চনত যুদ্ধ আৰম্ভ হোৱাৰ পৰাই ইউক্ৰেইন-ৰাছিয়াৰ সংঘাতৰ মধ্যস্থতাত বিশেষকৈ বন্দী বিনিময় চুক্তিত মহম্মদ বিন ছালমানে গুৰুত্বপূৰ্ণ ভূমিকা পালন কৰি আহিছে।
বিগত মাহত ৰাছিয়া আৰু আমেৰিকাৰ মাজত হোৱা আলোচনাৰ আয়োজক দেশ আছিল ছৌদি আৰব। গতিকে জেলেনস্কিয়ে আশা কৰিছে যে, ক্ৰাউন প্ৰিন্স ছলমানে তেওঁক সন্মান কৰিব আৰু চুক্তিখনত নিজৰ পক্ষ উপস্থাপন কৰিব।
জেলেনস্কিৰ এই ভ্ৰমণৰ সময়তে আমেৰিকা আৰু ইউক্ৰেইনৰ মাজৰ সম্পৰ্ক ভয়ংকৰভাৱে অৱনতি ঘটিছে, তাৰ পিছত ৱাশ্বিংটনে কিয়েভৰ সৈতে সামৰিক সাহায্য আৰু চোৰাংচোৱা তথ্য ভাগ-বতৰা কৰা বন্ধ কৰি দিছে।
মহম্মদ বিন ছালমান ৰাষ্ট্ৰপতি ট্ৰাম্পৰ বন্ধু আৰু পুটিনৰ সৈতেও তেওঁৰ ভাল সম্পৰ্ক আছে। আশা কৰা হৈছে যে এই বৈঠকৰ জৰিয়তে জেলেনস্কিক ৰাছিয়াৰ বিষয়াসকলৰ সৈতে আলোচনাত অন্তৰ্ভুক্ত কৰিব পৰা যাব বা আমেৰিকাৰ হৈ তেওঁৰ পক্ষক উপস্থাপন কৰিব পৰা যাব।
সংবাদ মাধ্যমত দিয়া এটা পোষ্টত জেলেনস্কিয়ে কয় যে, তেওঁলোকে বিশ্বাসযোগ্য আলোচনাৰ প্ৰতি সম্পূৰ্ণৰূপে প্ৰতিশ্ৰুতিবদ্ধ, আৰু আশা কৰে যে, তেওঁলোকে প্ৰয়োজনীয় সিদ্ধান্ত আৰু পদক্ষেপসমূহৰ ওপৰত আলোচনা কৰিব আৰু একমত হ’ব। এতিয়া লক্ষ্যণীয় হ’ব এই বৈঠক আৰম্ভ হোৱাৰ পূৰ্বে ছৌদি ক্ৰাউন প্ৰিন্স ছলমানক লগ পোৱাটো তেওঁৰ বাবে কিমান লাভজনক হ’ব।
