শুকুৰবাৰে ভাৰতত উদযাপন কৰা হৈছে হোলী উৎসৱ। য’ত উত্তৰ প্ৰদেশৰ সম্ভলত এফালে শান্তিপূৰ্ণভাৱে হোলী শোভাযাত্ৰা উলিওৱা হয়। আনহাতে সকলোৱে শান্তিপূৰ্ণভাৱে জুম্মাৰ নামাজ আদায় কৰিছিল যদিও চুবুৰীয়া দেশ পাকিস্তানত জুমাৰ নামাজৰ সময়ত মছজিদত সংঘটিত হয় বিস্ফোৰণ।
ৰমজান মাহ চলি আছে আৰু আজি ৰমজান মাহৰ দ্বিতীয়টো শুকুৰবাৰ। সেইদিনা পাকিস্তানৰ খাইবাৰ পখতুনখোৱাত দক্ষিণ ৱাজিৰিষ্টানত শুকুৰবাৰৰ নামাজৰ সময়ত মছজিদত বোমা বিস্ফোৰণ ঘটে, য’ত পাকিস্তানৰ উগ্ৰ ৰাজনৈতিক দল জমিয়ত উলেমা-ই-ইছলামৰ জিলা মুৰব্বী আব্দুল্লা নাদীমৰ লগতে আন ৩জন লোক আহত হয়।
পাকিস্তানৰ সংবাদ মাধ্যমক, জিলা আৰক্ষী বিষয়া আছিফ বাহাদুৰে জনোৱা মতে, আজম ৱাৰছাক বাইপাছ ৰোডৰ মৌলানা আব্দুল আজিজ মছজিদত দিনৰ ১:৪৫ বজাত এটা ইম্প্ৰভাইজড এক্সপ্ল’ছিভ ডিভাইচ (আই ই ডি) বিস্ফোৰণ ঘটে, য’ত এই যন্ত্ৰটো মছজিদৰ চৌহদতে ৰখা হয়।
আৰক্ষী বিষয়াই জনোৱা মতে, বিস্ফোৰণত গুৰুতৰভাৱে আহত হয় জেইউআই জিলাৰ মুৰব্বী আব্দুল্লা নাদীম। জেইউআইৰ সৈতে জড়িত আৰু ৩জন লোকো সামান্য আঘাতপ্ৰাপ্ত হয়। আৰক্ষীয়ে আহত ৩জনক ৰেহমানুল্লাহ, মোল্লা নূৰ আৰু শ্বাহ বেহৰাণ বুলি চিনাক্ত কৰিছে।
ডি পি অ’ বাহাদাৰে জানিবলৈ দিয়া মতে, আহত আটাইকেইজনক ততাতৈয়াকৈ জিলা সদৰ চিকিৎসালয়লৈ চিকিৎসাৰ বাবে প্ৰেৰণ কৰা হয়। ঘটনাস্থলীত আৰক্ষী উপস্থিত হোৱাৰ লগতে এই ঘটনাৰ আঁৰৰ কাৰণৰ তদন্ত চলি থকা বুলি আৰক্ষী বিষয়াগৰাকীয়ে জানিবলৈ দিয়ে।
ইয়াৰ পূৰ্বেও খাইবাৰ পাখতুনখোৱাত বিশেষকৈ জুম্মাৰ নামাজৰ সময়ত মছজিদসমূহক লক্ষ্য কৰি লোৱা হৈছিল, কাৰণ জুম্মা নামাজৰ বাবে মছজিদত বৃহৎ সংখ্যক লোকৰ সমাবেশ হয়। বিগত মাহত খাইবাৰ পখতুনখোৱাৰ নৌশ্বেৰা জিলাৰ দাৰুল উলুম হাক্কানিয়া মাদ্ৰাছাত সংঘটিত বিস্ফোৰণত জেইউআই-এছৰ নেতা মৌলানা হামিদুল হক হাক্কানীকে ধৰি ৬জন লোক নিহত হোৱাৰ লগতে আহত হয় ১৫জন।
ইয়াৰ পূৰ্বেও ২০২৩ চনৰ ৩০ জানুৱাৰীত পেছাৱৰৰ ৰেড জ’ন অঞ্চলৰ এটা মছজিদত বিস্ফোৰণ ঘটে। বিষয়াসকলে জনাই যে, এই বিস্ফোৰণত কমেও ৫৯ জন লোক নিহত হোৱাৰ বিপৰীতে ১৫৭ জন আহত হয়।
