অনিশ্চয়তাৰ খেল ক্ৰিকেট। পুনৰ প্ৰমাণ হ’ল সেই কথা। ১৬ বছৰীয়া টি-২০ ক্ৰিকেটৰ ছুপাৰ অভাৰ ইতিহাসত নোহোৱা নোপোজা ঘটনা সংঘটিত হ’ল এখন আন্তঃৰাষ্ট্ৰীয় মেচত। মেচৰ ফলাফল নিৰ্ণয়ৰ বাবে হোৱা ছুপাৰ অভাৰত এটা দলে এক ৰানো সংগ্ৰহ কৰিব নোৱাৰা ঘটনাই ক্ৰিকেট বিশ্বক হতচকিত কৰি তুলিছে।
বাহৰেইন আৰু হংকঙৰ মাজত অনুষ্ঠিত হোৱা আই চি চি চিডব্লিউচি চেলেঞ্জ লীগ বিৰ মেচখনত এই অনাকাংক্ষিত অভিলেখ সৃষ্টি হয়। বাহৰেইনৰ নামত সংযোজন হয় এই লজ্জাজনক অভিলেখ।
উল্লেখ্য যে, শুকুৰবাৰে কুৱালালামপুৰত হংকং আৰু বাহৰেইনৰ মাজত অনুষ্ঠিত হৈছিল মেচখন। এই ৰোমাঞ্চকৰ মেচখন টাই হোৱাৰ পিছতে ১৬ বছৰীয়া ছুপাৰ অভাৰ ইতিহাসত কোনো দিনে নোহোৱা ঘটনা সংঘটিত হয়।
মালয়েছিয়া ত্ৰিদেশীয় শৃংখলাত হংকঙে প্ৰথমে টছত জয়ী হৈ বেটিং কৰি নিৰ্ধাৰিত অভাৰত ৭ উইকেটত ১২৯ ৰান সংগ্ৰহ কৰে। ইয়াৰ প্ৰত্যুত্তৰত বাহৰেইনৰ অপেনাৰ যুটী ফিয়াজ আহমেদ আৰু প্ৰশান্ত কুৰুপে ৩০ ৰান কৰি দলক সুন্দৰ আৰম্ভণি দিয়ে। কিন্তু ইয়াৰ পিছৰে পৰা নিৰন্তৰভাৱে এটাৰ পিছত এটা উইকেট হেৰুৱাই শলঠেকত পৰে বাহৰেইন। ৬৭ ৰানতে দলটোৱে হেৰুৱাই পাঁচটাকৈ গুৰুত্বপূৰ্ণ উইকেট।
মেচখনত জয়ী হ’বলৈ বাহৰেইনক অন্তিম অভাৰত প্ৰয়োজন হয় ১৩ ৰানৰ। অভাৰটোৰ পঞ্চমটো বলত ছয় কোবোৱাৰ লগে লগে স্ক’ৰ টাই হয়। কিন্তু অভাৰৰ অন্তিমটো বলত নচৰুল্লা আউট হোৱাৰ লগে লগে খেলখন টাইৰূপে সমাপ্ত হয়।
ইয়াৰ পিছত খেলখনৰ ফলাফল নিৰ্ণয়ৰ বাবে হয় ছুপাৰ অভাৰ। নিয়ম অনুসৰি দ্বিতীয় ইনিংছত বেট ধৰিবলৈ অহা বাহৰেইনে ছুপাৰ অভাৰত প্ৰথমে বেট ধৰিবলৈ আহে। কিন্তু হংকঙৰ জ্যেষ্ঠ স্পিনাৰ এহছাছ খানে সুন্দৰ বলিং কৰি ক্ৰমাগতভাৱে দুজনকৈ বেটছমেনক পেভেলিয়নলৈ ওভতাই পঠিয়াই। আই চি চিৰ নিয়ম অনুসৰি, ছুপাৰ অভাৰত দুটা উইকেট যোৱাৰ লগে লগে সেই দলটোৰ ইনিংছ সিমানতেই অন্ত পৰে।
ইয়াৰ পিছত ১ ৰানৰ লক্ষ্য লৈ বেটিং কৰিবলৈ অহা হংকঙে অভাৰৰ তৃতীয়টো বলত ৰান সংগ্ৰহ কৰি মেচখন জয়ী হয়। টি-২০ ক্ৰিকেট ইতিহাসত ছুপাৰ অভাৰৰ জৰিয়তে মেচৰ ফলাফল নিৰ্ণয় হোৱা এইখন ৩৩ সংখ্যক মেচ।
