হৰমনপ্ৰীত কৌৰ নেতৃত্বাধীন মুম্বাই ইণ্ডিয়ানছ দলে দ্বিতীয়বাৰৰ বাবে খিতাপ দখল কৰিলে মহিলা প্ৰিমিয়াৰ লীগৰ। আনহাতে এইবাৰৰ সৈতে একেৰাহে তৃতীয়বাৰৰ বাবে ৰানাৰ্ছ আপ হিচাপেই সন্তুষ্ট হ’বলগীয়া হয় দিল্লী কেপিটেলছ।
শনিবাৰে মুম্বাইৰ ব্ৰেবৰ্ণ ষ্টেডিয়ামত অনুষ্ঠিত হোৱা ফাইনেলত দিল্লী কেপিটেলছক ৮ ৰানত পৰাস্ত কৰি মুম্বাইয়ে খিতাপ দখল কৰে। মুম্বাইৰ এই জয়ত গুৰুত্বপূৰ্ণ ভূমিকা গ্ৰহণ কৰে অধিনায়ক হৰমনপ্ৰীত আৰু নেট স্কাইভাৰ-ব্ৰুণ্টে।
হৰমনপ্ৰীতে ৬৪ ৰানৰ ইনিংছ খেলাৰ লগতে ব্ৰুণ্টে বেটিঙত ৩০ ৰান আৰু বলিঙত ৩টা উইকেটেৰে অলৰাউণ্ড প্ৰদৰ্শন আগবঢ়াই।
উল্লেখ্য যে, লক্ষ্যৰ পিছা কৰিবলৈ অহা দিল্লীয়ে আৰম্ভণিৰে পৰা এটাৰ পিছত এটাকৈ উইকেট হেৰুওৱাৰ ফলতেই মেচখনত পৰাজয়বৰণ কৰিবলগীয়া হয়।
প্ৰথমে বেটিং কৰা মুম্বাই ইণ্ডিয়ানছে অধিনায়ক হৰমনপ্ৰীত কৌৰৰ ৬৬ ৰান আৰু নেট স্কাইভাৰ-ব্ৰুণ্টৰ ৩০ ৰানৰ সহায়ত নিৰ্ধাৰিত ২০ অভাৰত ৭টা উইকেট হেৰুৱাই ১৪৯ ৰান সংগ্ৰহ কৰে।
ইফালে নিৰ্ধাৰিত লক্ষ্যত উপনীত হ’বলৈ ৮ ৰান বাকী থাকোতেই ইনিংছ সামৰে দিল্লী কেপিটেলছে। দিল্লীয়ে নিৰ্ধাৰিত ২০ অভাৰত ১৪১ ৰানহে সংগ্ৰহ কৰিবলৈ সক্ষম হয়। বেটিঙত দিল্লীৰ হৈ সামান্যতম যুঁজ দিয়া দেখা গৈছিল জেমিনাহ ৰড্ৰীগেছ, মাৰিজেন কেপ আৰু নিকি প্ৰসাদে। ৰড্ৰীগেছে ৩০, কেপে ৪০ আৰু নিকিয়ে ২৫ ৰানৰ ইনিংছ খেলে।
ইফালে মুম্বাইৰ ব্ৰুণ্টে তিনিটা, এমেলিয়া কেৰে দুটা আৰু ইছমাইল, হেইলি মেথিউছ আৰু ইছাকেই এটাকৈ উইকেট লাভ কৰে।
